Португалиялик 39 ёшли футболчи Криштиану Роналду эндиликда мамлакат терма жамоасининг тегиниб бўлмас ўйинчиси ҳисобланмайди. Бу ҳақда «Relevo» нашри маълум қилди.

Қайд этилишича, Португалия терма жамоаси бош мураббийи Роберто Мартинес ва 39 ёшли ҳужумчи Криштиану Роналду ўзаро келишиб олган. Энди Роналду бошланғич таркибда майдонга тушган ўйинларда бош мураббий Роберто Мартинес исталган пайт (вазиятга қараб) ҳужумчини захирага олиши мумкин.

Айтиш жоиз, 2022 йили Қатарда бўлган жаҳон чемпионатида мураббийлар штаби Криштиану Роналду ўрнига Гонсалу Рамушдан фойдалангани шов-шув бўлган эди.

Манбага кўра, Европа чемпионати Роналду фаолиятидаги охирги катта турнир бўлмайди, футболчи 2026 йили бўладиган Жаҳон чемпионатида ҳам иштирок этишга қарор қилган.

Португалия миллий термаси сафида 2003 йилдан бери тўп тепаётган форвард футбол тарихида терма жамоалар миқёсида энг кўп ўйинда қатнашиб, рақиблар дарвозасини энг кўп ишғол қилган футболчи ҳисобланади. Унинг ҳисобида халқаро миқёсда 207 та ўйин, 130 та гол ва 46 та ассист бор.

Шунингдек, Роналду 2016 йили сардорлик қилган жамоа Франциядаги мусобақада ғолиб чиққан ҳолда қитъа чемпионлигини қўлга киритган.