Фабио Каннаваро Ўзбекистон миллий терма жамоасига бош мураббий этиб тайинланди. Бу ҳақда Ўзбекистон Футбол Ассоциациясининг расмий саҳифасида маълумот берилди.

«Ўзбекистон футбол ассоциацияси 3 карра Жаҳон чемпионати иштирокчиси, 2006-йилги Жаҳон чемпионати ғолиби, яқин ўтмишнинг энг яхши ҳимоячиларидан бири, таниқли мутахассис — Фабио Каннаваро билан шартнома тузди. Италиялик мураббий жамоамизни АҚШ, Канада ва Мексика майдонларида ўтадиган Жаҳон чемпионатига тайёрлайди», — дейилади ЎФА хабарда.

Шунингдек, Фабиога Ўзбекистон миллий терма жамоаси бошқарувида қуйидаги мураббийлар ёрдам беришади:

• Аyженио Албарелла — ёрдамчи мураббий («Япония» терма жамоаси, «Ювентус», «Удинезе» ва «Динамо Загреб»да ишлаган);
• Тройзе Франсеско — жисмоний тайёргарлик бўйича мураббий («Беневенто», «Удинезе» ва «Динамо Загреб»да фаолият юритган);
• Антонио Кименти — дарвозабонлар мураббийи («Италия» ёшлар терма жамоаси, «Сампдория» ва «Спал» клубларида ишлаган).

Маълумот учун, Ўзбекистон миллий терма жамоаси октябрь ойида Қувайт ва Уругвай терма жамоаларига қарши ўртоқлик ўйини ўтказади.