Fabio Kannavaro Oʻzbekiston milliy terma jamoasiga bosh murabbiy etib tayinlandi. Bu haqda Oʻzbekiston Futbol Assotsiatsiyasining rasmiy sahifasida maʼlumot berildi.

“Oʻzbekiston futbol assotsiatsiyasi 3 karra Jahon chempionati ishtirokchisi, 2006-yilgi Jahon chempionati gʻolibi, yaqin oʻtmishning eng yaxshi himoyachilaridan biri, taniqli mutaxassis — Fabio Kannavaro bilan shartnoma tuzdi. Italiyalik murabbiy jamoamizni AQSH, Kanada va Meksika maydonlarida oʻtadigan Jahon chempionatiga tayyorlaydi”, — deyiladi OʻFA xabarda.

Shuningdek, Fabioga Oʻzbekiston milliy terma jamoasi boshqaruvida quyidagi murabbiylar yordam berishadi:

• Ayjenio Albarella — yordamchi murabbiy (“Yaponiya” terma jamoasi, “Yuventus”, “Udineze” va “Dinamo Zagreb”da ishlagan);
• Troyze Fransesko — jismoniy tayyorgarlik boʻyicha murabbiy (“Benevento”, “Udineze” va “Dinamo Zagreb”da faoliyat yuritgan);
• Antonio Kimenti — darvozabonlar murabbiyi (“Italiya” yoshlar terma jamoasi, “Sampdoriya” va “Spal” klublarida ishlagan).

Maʼlumot uchun, Oʻzbekiston milliy terma jamoasi oktyabr oyida Quvayt va Urugvay terma jamoalariga qarshi oʻrtoqlik oʻyini oʻtkazadi.