Фото: AP

ФИФА 2025 йилда АҚШда клублар ўртасидаги Жаҳон чемпионати («ФИФА 25») ўтказишини эълон қилган эди.

Яқинда Испаниянинг «Реал Мадрид» клуби АҚШда бир ой давом этадиган янгиланган клублар ўртасидаги жаҳон чемпионатига иштирок этмаслиги ҳақидаги хабарлар тарқалганди.

Бу ҳақда жамоа бош мураббийи Карло Анчелотти «AS» нашрига берган интервьюсида шундай деганди: «Реал»нинг битта ўйини камида 20 миллион евро даромад келтиради. ФИФА бизга бутун турнир учун шунча пул тўламоқчи. Қатнашмаймиз, албатта».

Футбол экспертларига кўра, «Реал Мадрид» ушбу турнирда иштирок этмаса, ФИФА бундан катта зарар кўради. Испания жамоасини Қўшма Штатлардаги мухлисларининг кўплигини ҳисобга олинса, бу тижорий ҳамкорларнинг ҳам катта қисмидан айрилиб қолиш хавфини юзага чиқариши тахмин қилинди.

Шундан сўнг тарқалган хабарларга кўра, агар мадридликлар АҚШга бормаса, уларнинг ўрнига «Барселона» таклиф этилиши муҳокама қилинган.

Гап шундаки, каталонияликлар Европадан таклиф қилинган 12 та жамоа ичида йўқ эди. Чунки турнирда «Челси», «Реал Мадрид», «Манчестер Сити», «Бавария», «ПСЖ», «Интер», «Порту», «Бенфика», «Боруссия Дортмунд», «Ювентус», «Атлетико Мадрид», «Ред Булл Залсбург» УЕФА шарафини ҳимоя қилиши назарда тутилганди.

Ваниҳоят, «Реал Мадрид» ва ФИФА ўзаро келишувга эришди. Футбол инсайдерларига кўра, бунга бериладиган мукофот пули миқдори ўзгаргани сабаб бўлган бўлиши мумкин.

«Реал Мадрид» раҳбарияти Карло Анчелоттининг интервьюсини уюштирган, деган тахминлар ҳам йўқ эмас. Мадрид клуби бу орқали яхшироқ маблағ ишлаб олишни истаган бўлиши мумкин.

«Реал Мадрид» ФИФА томонидан ташкил этиладиган клублар ўртасидаги жаҳон чемпионатидаги иштироки ҳеч қачон сўроқ остида бўлмаган», дейилади клуб баёнотида.

Карло Анчелотти ҳам клуб баёнотидан сўнг ўз фикрларига тушунтириш бериб кетди.

«Интервьюда менинг гапларим нотўғри талқин қилинган. «Реал Мадрид» учун яна бир титул ютиш имкониятини берувчи турнирдан воз кечиш бу мен учун яхши ҳолат эмас», деди у.

«Реал Мадрид»нинг ушбу манёври «Барселона»ни умидвор қилиб қўйган эди. Аммо охирида ҳаммаси мадридликлар фойдасига ҳал бўлди.

Турнир 2025 йилнинг 15 июнь — 13 июль кунлари Америка Қўшма Штатларида ўтказилиши режалаштирилган бўлиб, унда 32 та жамоа иштирок этади.