Қурилиш вазирлиги «Тошкентда битта уй учун 200 минг долларгача харажат бор», дея жамоатчилик орасида асоссиз ахборот тарқалишига сабабчи бўлган қурувчи устидан ИИВга ариза киритди. Бу ҳақида вазирликнинг Telegramʼдаги каналида хабар берилди.

Унда айтилишича, жорий йилнинг 29 август куни қурилиш соҳаси тадбиркорлари билан ўтказилган очиқ мулоқотда ўзини бир нечта қурилиш компаниялари раҳбари сифатида таништирган фуқаро У.А. турли даъволар билан чиққан.

Қайд этилишича, унинг «Тошкентда битта уй учун 200 минг долларгача харажат бор», деган сўзлари ижтимоий тармоқларда турли муҳокамаларни келтириб чиқарган.

«Натижада қурилиш соҳасида республика миқёсида олиб борилаётган ислоҳотларга, соҳа вакиллари ҳамда Қурилиш ва уй-жой коммунал хўжалиги вазирлигига нисбатан салбий муносабат шаклланмоқда. Бу эса ўз навбатида Вазирлик ва унинг тизимида фаолият юритаётган ходимларнинг шаъни, қадр-қиммати ва ишчанлик обрўсига путур етказмоқда», — дейилади вазирлик муносабатида.

Шу боис Қурилиш ва уй-жой коммунал хўжалиги вазирлиги фуқаро У.А.га нисбатан тегишли тартибда жавобгарлик чоралари кўриш ва ҳуқуқий баҳо берилишини сўраб, Ички ишлар вазирлигига расмий ариза киритган.

«Қурилиш соҳасига оид барча давлат хизматлари ва тўловлар белгиланган тартибда электрон тарзда амалга оширилади. Бу жараёнда қўшимча маблағ талаб қилиниши қатъий тақиқланган. Жисмоний ва юридик шахслар шаҳарсозлик ҳужжатларини олиш учун аризаларни фақат Ягона интерактив давлат хизматлари портали (мй.гов.уз) ёки Давлат хизматлари марказлари орқали юборишлари мумкин.

Аризаларни кўриб чиқишда фуқаро ва ваколатли орган вакили ўртасида тўғридан-тўғри мулоқотга йўл қўйилмайди. Хусусан, объект қурилишига оид рухсатнома олишдан тортиб, уни фойдаланишга қабул қилишгача бўлган барча жараёнлар «Шаффоф қурилиш» миллий ахборот тизими орқали тўлиқ назорат қилинади. Бу жараёнлар Вазирлар Маҳкамасининг 2022 йил 20 апрелдаги 200-сон қарори билан тасдиқланган маъмурий регламентлар асосида аниқ тартибга солинган», — дейилган хабарда.