Ассалому алайкум, халқаро майдонда юз бераётган воқеа ва ҳодисаларнинг қисқача шарҳи «Халқ сўзи» ва «Народное слово» газеталарининг таҳлилий-информацион дастурида

Исроил Ливанни «тош даври»га қайтариш билан таҳдид қилди

Исроил мудофаа вазири Ёав Галлант Вашингтонда журналистлар билан бўлган учрашувда Ливанга катта зарар етказиши мумкинлигидан огоҳлантирди.

«Биз урушни хоҳламаймиз, лекин ҳар бир сценарийга тайёрланяпмиз. «Ҳизбуллоҳ» агар уруш бошланса, Ливанга катта зарар етказишимиз мумкинлигини жуда яхши тушунади. Исроил Ливанни тош даврига қайтаришга қодир, лекин биз буни хоҳламаймиз», деган Галлант.

Бош вазир Бенямин Нетаняҳу Ливан билан чегарада кескин операцияга тайёрланаётганини маълум қилиб келмоқда. Ўз навбатида «Ҳизбуллоҳ» раҳбари Ҳасан Насруллоҳ ҳам агар Исроил кенг кўламли уруш бошласа, ҳеч қандай чекловларга қараб ўтирмаслигини таъкидлаган.

Америка Қўшма Штатлари Мудофаа вазири Ллойд Остин сешанба куни Галлантга «Ҳизбуллоҳ» билан уруш Яқин Шарқ учун даҳшатли оқибатларга олиб келиши мумкинлигини айтиб, дипломатик ечим топишга чақирди.

«Жо, сен бизнинг мамлакатимизни ўлдирдинг» — Трамп ва Байден дебати қандай ўтди?

Қўшма Штатларнинг амалдаги ва собиқ президенти Жо Байден ҳамда Доналд Трамп ўртасида сайловолди теледебатлар бўлиб ўтди.

Бир ярим соатлик суҳбат бошланишидан олдин Демократ Байден ва Республикачи Трамп қўл бериб кўришишдан бош тортишган. Муҳокама қилинган асосий мавзулардан бири Россия Федерацияси президенти Владимир Путин сиёсати ҳақида бўлган. Трамп Путиннинг Украинадаги урушини тугатиш бўйича қабул қилиб бўлмайдиган шартлар эълон қилганини маълум қилди «Лента.ру» нашри. Собиқ президентнинг фикрича, Кремль Украинанинг бутун ҳудудини босиб олишга қодир ва Россия Трамп даврида ҳеч қандай ҳарбий операциялар бошламаган.

Байден Москванинг Украинадаги юришидан сўнг Беларусьга таҳдид қилишига ишонч билдирган.

«Москва Украинадан кейин ҳам тўхтамайди. Полша билан нима бўлади? Белоруссияга нима бўляпти? Сизнингча, НАТО мамлакатлари билан нима содир бўлади? Владимир Путин Совет империясининг қисмларини қайта тикламоқчи», — деган Байден.

Жами ҳисоб-китобларга кўра, иккала номзод ҳам Россия раҳбарининг исмини етти марта тилга олган.

Сиёсатчилар баҳси 20 дақиқа шахсий ҳақоратсиз ўтган, холос. 81 ёшли Байден 78 ёшли Трампни бир неча бор «мағлуб» деб атаган. Собиқ президент бунинг учун кечирим сўрашга ундаган бўлсада Байден буни рад этган.

Ўз навбатида Трамп ҳам Байденни «жиноятчи» деб атади. Унинг фикрича, амалдаги раҳбар президентликдан кетиши билан судга тортилиши керак. Бундан ташқари у Байден ўғлининг судланиш жараёнини эслатган.

Доналд Трамп Жо Байденнинг музокара вақтидаги нутқига эътибор қаратар экан, иммиграция ҳақидаги сўзларини тўлалигича ифодалаб бера олмаганини қўшимча қилган.

«Ростини айтсам у гапининг охирида нима деганини билмайман. Менимча, унинг ўзи ҳам нима деганини билмайди», — деди собиқ президент.

Сиёсатчилар дебат давомида бир-бирларининг исмини айтмасликни афзал кўрган. Фақатгина бир марта Трамп Байденга «Жо, сен бизнинг мамлакатимизни ўлдирдинг» деган.

АҚШ Демократик партияси вакиллари президент Жо Байден учун муваффақиятсиз дебатлардан сўнг унинг номзодини алмаштириш масаласини муҳокама қила бошлаган.

«Демократлар президент Жо Байденнинг омадсиз чиқишидан сўнг шунчалик ваҳимага тушдики, баъзилар бир пайтлар гапириб бўлмайдиган нарсани: уни алмаштириш ҳақида фаол баҳслашмоқда», дейилади «Politico» нашрида.

Эронда сайлов бошланди

Май ойида Эрон президенти Иброҳим Раисий авиаҳалокатда вафот этганидан сўнг ўтказилаётган президентлик сайловлари бугун эрталаб бошланди.

Қайд этилишича, конституциянинг 131-моддасига кўра, президент вафот этган ёки меҳнатга лаёқатсиз деб эълон қилингач, унинг вазифалари биринчи вице-президентга ўтказилади. Шундан сўнг 50 кун ичида сайлов амалга оширилиши керак. Шу сабабли ҳам ҳозирда давлат раҳбари лавозимини вице-президент Муҳаммад Мохбер эгаллаб турибди.

Президентлик учун курашда собиқ ички ишлар вазири Мустафо Пурмуҳаммадий, Эрон олий раҳбарининг Миллий хавфсизлик олий кенгашидаги вакили Саид Жалилий, парламентнинг амалдаги спикери Муҳаммад Бағер Ғолибаф ва собиқ соғлиқни сақлаш ва тиббиёт таълими вазири Масуд Пезешкиян иштирок этмоқда.

Овоз беришнинг биринчи натижалари 29 июнь куни тушдан олдин эълон қилинади.

Украина уруш чўзилишини истамайди

«Украина «урушни чўзиш»ни истамаяпти, иттифоқчилар билан биргаликда ишлаб чиқилаётган тинчлик режаси бир неча ой ичида тайёр бўлиши керак», деган Зеленский Брюсселдаги конференцияда.

«Бизнинг вақтимиз кўп эмас, бизда жанг ва тинч аҳоли орасида яраланганлар ва ҳалок бўлганлар кўп. Шу сабабли уруш йиллар давомида давом этишини хоҳламаймиз», деган Украина раҳбари.

Айтилишича, иккинчи тинчлик йиғилиши 2024 йил охиригача ўтказилади ва унга Россия ҳам таклиф этилади.

Исроил ва «Ҳизбуллоҳ» муносабати таранглашуви фонида АҚШ Ўрта ер денгизи шарқига ҳарбий кема жўнатди

АҚШ Ливаннинг жанубий чегарасида вазият кескинлашаётган бир пайтда Исроил ва Ливаннинг «Ҳизбуллоҳ» ҳаракати ўртасидаги зиддиятни тўхтатиш учун Ўрта ер денгизи шарқий қисмига амфибия ҳужум кемасини жўнатган. Бу ҳақда «ABC News» телеканали уч америкалик расмийга таяниб хабар тарқатди.

Аввалроқ, «ABC News» манбаларга таяниб, АҚШ Қуролли кучлари Исроил ва «Ҳизбуллоҳ» ўртасидаги қарама-қаршилик кучайган тақдирда ўз фуқароларини эвакуация қилиш учун ўз кучларини Ливан ва Исроилга яқинлаштираётгани ҳақида хабар берган эди.

Расмийларнинг телеканалга маълум қилишича, бортида 2200 денгиз пиёдаси бўлган кеманинг Ўрта ер денгизи шарқий қисмига транзити АҚШ Америка фуқароларини Ливандан олиб чиқишни режалаштираётганидан далолат бермайди. Уларга кўра, бу жиловлаш мақсадида амалга оширилмоқда. Яъни бу ҲАМАС ва Исроил ўртасидаги уруш кенгроқ минтақавий можарога айланиб кетишининг олдини олишга қаратилган.