Бош прокуратура ҳузуридаги Департамент Қорақалпоғистон Республикасида истеъмолга яроқсиз алкоголь ва тамаки маҳсулотлари савдоси билан шуғулланиб келган шахсларни қўлга туширди. Бу ҳақда Департаментнинг матбуот хизмати хабар берди.

Маълум бўлишича, Департаментнинг Қорақалпоғистон Республикаси бошқармасининг ҳудудий бўлимлари томонидан ИИБ ходимлари билан ҳамкорликда ўтказилган тезкор-қидирув тадбирлари ўтказган.

Ушбу тадбирларда Қўнғирот, Шуманай, Тахиатош ва Амударё туманларидаги 4 та савдо дўкони ва 1 та умумий овқатланиш шохобчасида савдога қўйилган турли номдаги жами 806 дона қалбаки акциз маркали алкоголь маҳсулотлари ашёвий далил сифатида олинган.

Шунингдек, Тўрткўл, Тахтакўпир ва Хўжайли туманларида қонунга хилоф равишда алкоголь ва тамаки маҳсулотлари савдоси билан шуғулланиб келган фуқаролар Д.Н., Н.А., С.Я. ва Р.М.дан қўлбола усулда тайёрланган жами 706 дона турли ҳажмдаги «Karataw» номли алкоголь ҳамда 12 турдаги 2 минг 324 қути тамаки маҳсулотлари ҳужжатлаштирилган.

«Мазкур ҳолатлар юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) ва 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят ишлари қўзғатилиб, тергов ҳаракатлари ўтказилмоқда», дейилади хабарда.

Аввалроқ, бир қути «R1» сигаретини қимматга сотаман деб, икки ярим минг қути ноқонуний тамаки маҳсулоти борлигини билдириб қўйилгани ҳақида хабар берилганди.