Маълумки, Вазирлар Маҳкамасининг жорий йил 14 июлда қабул қилинган қарори асосида мамлакатимизда босқичма-босқич Илк ривожланиш марказлари фаолиятини йўлга қўйиш режалаштирилган. Фарғона вилоятида бу борада Қўқон шаҳри, Қува ва Ёзёвон туманида учта ана шундай марказ ташкил этиш кўзда тутилган.

  Шу кунларда Ёзёвон тумани ва Қўқон шаҳрида замонавий мезонлар бўйича барпо этилган Илк ривожланиш марказлари иш бошлади.

  — Бугунги кунда шаҳримизда 150 нафардан зиёд 2-7 ёшгача бўлган болалар алоҳида эътиборга муҳтож ёшлар тоифасига киритилган бўлиб, ушбу марказ биринчи навбатда шундай фарзандлари бўлган оилаларга хизмат кўрсатади, — дейди Қўқон шаҳар мактабгача ва мактаб таълими бўлими бошлиғи Иродахон Мирзаева. — Бу ерда имконияти чекланган, эҳтиёжманд ва алоҳида эътиборга муҳтож болаларга таълимнинг илк босқичи сабоқлари берилади.

 Янги марказда хоналар болаларнинг ёш хусусиятларига мос ривожлантирувчи муҳитга рағбат тарзида жиҳозланди. Шу тариқа малакали устозлар “Камбағал оилалар реестри”га киритилган оилалар фарзандлари ҳамда алоҳида таълим эҳтиёжлари бўлган болаларга таълим беришга киришди.

Шунингдек, марказда ривожланишда нуқсони бўлган болалар ҳам таълим олади ва даволанади. “Махсус мактабгача таълим хизмати” тизими орқали эса педагоглар алоҳида таълим эҳтиёжлари бўлган болаларнинг хонадонига борган ҳолда таълим-тарбия жараёни билан шуғулланади.

  Ботир МАДИЁРОВ

«Халқ сўзи».