Олий Мажлис Қонунчилик палатасидаги Ўзбекистон Экологик партияси фракциясининг навбатдаги йиғилишида «Давлат хизматлари кўрсатиш тизими такомиллаштирилганлиги муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги қонун лойиҳаси муҳокама этилди.

Йиғилишда таъкидланганидек, кейинги йилларда мамлакатимизда фуқаролар ва тадбиркорларга давлат хизматларини кўрсатиш тизими босқичма-босқич ислоҳ қилиниб, ортиқча бюрократик тўсиқларни бартараф этиш ҳамда давлат хизматларини кўрсатиш сифатини тубдан яхшилаш борасида тизимли чора-тадбирлар фаол амалга оширилмоқда.

Хусусан, давлат органлари, маҳаллий ижро этувчи ҳокимият органлари ва бошқа давлат ташкилотларида эскирган бюрократик тартиботлар, шу жумладан, электрон тизим орқали олиш имконияти мавжуд бўлган маълумотларни қоғоз кўринишида сўраб олиш, ишни ташкил этиш учун муҳим бўлмаган ҳужжатларни талаб қилиш бекор қилинди.

Кўриб чиқилган қонун лойиҳаси билан давлат хизматлари кўрсатиш тизимини такомиллаштириш, жумладан, диплом, лицензия, рухсатнома, давлат божи, йиғимлар ва бошқа тўловлар тўланганлигини тасдиқловчи ҳужжатлар каби бир қатор фактларни тасдиқловчи маълумотларни талаб қилишни бекор қилиш назарда тутилмоқда.

Шунингдек, лойиҳа билан «Давлат божи тўғрисида»ги Қонунга адвокатлик тузилмалари ҳамда боғдорчилик-узумчилик ширкатлари, матбуот, ишлаб чиқариш ва қишлоқ хўжалиги кооперативларини давлат рўйхатидан ўтказиш учун давлат божини БҲМнинг бир баравари миқдорида белгилашга қаратилган ўзгартиш ва қўшимчалар киритилиши таклиф этилмоқда.

Фракция йиғилишида депутатлар томонидан қонун лойиҳасининг қабул қилиниши давлат хизматларини кўрсатиш тизимини янада тартибга солишга, аҳоли ва тадбиркорлик субъектлари учун бюрократик тўсиқларни бартараф этишга, давлат хизматларини кўрсатганлик учун ундириладиган тўлов миқдорларини камайтириш ва давлат хизматларини кўрсатиш муддатларини қисқартиришга хизмат қилиши қайд этилди ҳамда қонун лойиҳаси қўллаб-қувватланди.

Шунингдек, йиғилишда кун тартибига киритилган бошқа масалалар кўриб чиқилди.