Кеча, 6 январь куни Саудия Арабистонида 23 ёшгача бўлган футболчилар ўртасидаги Осиё чемпионати мусобақаси старт олди. Кун доирасида “А” гуруҳининг 2 та ўйини ташкил этилди.

Дастлабки ўйинда Вьетнам U-23 терма жамоаси Иордания термаси билан куч синашди. Учрашув жануби-шарқий минтақа вакилининг 2:0 ҳисобидаги ғалабаси билан якунланди. Голларга Нгуен Хиу Минг ва Нгуен Дин Бак муаллифлик қилди.

Мусобақанинг очилиш ўйинида эса мезбон Саудия Арабистони терма жамоаси Қирғиз Республикасига қарши майдонга чиқди. Учрашув 1:0 ҳисобида Саудия термасининг ғалабаси билан якунланди.

Ўйинни томоша қилиш учун “Шаҳзода Абдуллоҳ ал-Файсал” стадионига ташриф буюрган 27 мингдан ортиқ мухлислар ҳал қилувчи голни 88 дақиқа кутдилар. Ўйиннинг асосий вақти якунланишига 2 дақиқа қолган бир пайтда “Ал-Наср” ҳужумчиси Ракан Ал-Ғамди баҳс тақдирини ҳал этган голни киритди.

Шу тариқа мусобақанинг “А” гуруҳида 1-тур ўйинлари якунланди. Бугун турнирнинг “B” ва “C” гуруҳларида ҳам мусобақалар давом эттирилади.

Кун доирасида Ўзбекистон U-23 терма жамоаси Ливан термаси билан куч синашади. Ушбу баҳс Тошкент вақти билан соат 19:00 да старт олади.