Бугун, 10 октябрь куни соат 19:00 да Тошкентдаги миллий стадионда футбол бўйича Ўзбекистон ва Эрон миллий жамоалари Жаҳон чемпионати саралаш ўйинини ўтказади. Шу муносабат билан пойтахт ИИББ ўйинга томоша қилиш учун келмоқчи бўлганларга мурожаат билан чиқди.

Ўйин учун iticket.uz сайти орқали сотувга чиқарилган барча чипталар сотиб бўлинган. Бу мазкур ўйинга қизиқиш жуда юқори экани ва стадионга ташриф буюрувчиларнинг кўп сонли бўлишини англатади.

Тошкент шаҳар ИИББга кўра, жамоат тартибини сақлаш ва фуқаролар хавфсизлигини таъминлаш учун Миллий гвардия билан ҳамкорликда тегишли чора-тадбирлар кўрилмоқда.

«Ҳурматли фуқаролар! Сизлардан футбол майдонига ўйин бошланишидан вақтлироқ ташриф буюришингизни, шахсий транспортингизда эмас, балки жамоат транспортида келишингизни, чипталарсиз футбол майдонига келмаслигингизни (чипталарсиз майдонга киритилмайди) сўраб қоламиз. Футбол ишқибозларига қулайлик яратиш ва тирбандликларга йўл қўймаслик мақсадида қўшимча жамоат транспортлари ажратилганини маълум қиламиз.

Шунингдек, футбол ишқибозлари майдонда жамоат тартибига ва ўрнатилган қоидаларга қатъий риоя қилишларини, мухлислик маданиятига амал қилишларини сўраймиз», дейилади ИИББ мурожаатида.