Фото: Юнус Бўриев / «Халқ сўзи»

150-юбилей Ассамблеяси доирасида ташкил этилган инсон ҳуқуқлари ҳимояси борасидаги давра суҳбатида Марказий Осиё мамлакатлари парламентлари аъзолари инсон ҳуқуқларини ҳимоя қилиш масалаларини муҳокама қилдилар. Асосий эътибор БМТ Бола ҳуқуқлари тўғрисидаги конвенциясини амалга оширишда парламентларнинг ўрни ва аҳамиятига қаратилди.

Бундан ташқари анжуман иштирокчилари Жаҳон соғлиқни сақлаш куни муносабати билан Тошкент шаҳридаги 7-сонли оилавий поликлиника фаолияти билан ҳам танишдилар.

Тадбирда Жаҳон соғлиқни сақлаш ташкилоти (ЖССТ), ЮНИСЕФ ва PMNCH (Она, бола ва ўсмирлар саломатлигини муҳофаза қилиш ҳамкорлиги) вакиллари ҳам қатнашдилар. Ўзбекистонда соғлом авлодни тарбиялаш йўлида соғлиқни сақлаш тизимидаги ислоҳотлар, ЖССТ ва ЮНИСЕФ билан амалга оширилаётган қўшма лойиҳалар ҳақида фикр юритилди.

Шунингдек, «Янги Ўзбекистон даври: ислоҳотлар ва истиқболлар» мавзусидаги медиа-тадбирлар дастурига биноан «Миллат саломатлиги: Ўзбекистонда соғлиқни сақлаш ва спорт соҳаларида инновациялар ва ислоҳотлар», «Бирдамлик йўли: миллатлараро тотувлик, диний бағрикенгликни таъминлаш борасида Ўзбекистон тажрибаси» мавзуларида йиғилишлар ҳам ўтказилди. Унда Ассамблея меҳмонлари, спикерлар ва ОАВ вакиллари иштирок этдилар.

                                                                                                                                                                                             «Халқ сўзи».