Олий Мажлис Сенатида Барқарор ривожланиш соҳасидаги миллий мақсад ва вазифалар ижроси ҳолатини кўриш бўйича ишчи гуруҳнинг йиғилиши бўлиб ўтди.

Унда вазирлик ва идоралар ҳамда илмий-таҳлилий муассасаларнинг масъул ходимлари иштирок этди.

Йиғилишда Ўзбекистон Республикасини барқарор ривожлантириш соҳасидаги миллий мақсад ва вазифаларни ҳамда уларнинг индикаторларини ҳозирги замон талабларидан келиб чиқиб қайта кўриб чиқиш, миллий индикаторлар бўйича маълумотлар базасини янгилаш ҳамда қабул қилинаётган стратегия ва тармоқ дастурларини Барқарор ривожланиш мақсадлари билан ҳамоҳанг тарзда ишлаб чиқиш зарурлиги таъкидланди.

Шунингдек, идоралараро ҳамкорликни кучайтириш, миллий ҳисоботларни халқаро мезонлар билан уйғунлаштириш масалалари ҳам муҳокама қилинди.

Йиғилиш якунида мазкур масалани ялпи мажлис муҳокамасига олиб чиқиш ҳамда унинг натижалари бўйича Ўзбекистон Республикасини 2030 йилгача бўлган даврда барқарор ривожлантириш соҳасидаги миллий мақсад ва вазифаларни самарали амалга ошириш бўйича чора-тадбирлар дастурини қабул қилишга келишиб олинди.