Иллюстратив фото

Ўзбекистонда 2026 йил 1 январдан эътиборан «А1» тоифадаги ҳайдовчилик гувоҳномаси жорий этилади. Бу ҳақда Вазирлар Маҳкамасининг «Транспорт воситаларини бошқариш тизимини янада такомиллаштириш чора-тадбирлари тўғрисида»ги қарорида келтирилган.

Қарорга кўра, миллий ҳайдовчилик гувоҳномасининг «А1» кичик тоифаси – мопед ва скутерларни, шунингдек, энг юқори конструктив тезлиги соатига 25 километрдан ошмайдиган, иш ҳажми 25 см³ гача бўлган ички ёнув двигателига эга бўлган ёки номинал (белгиланган) қуввати 0,25 киловаттгача бўлган кичик ҳажмдаги мототранспорт воситаларини (индивидуал ҳаракатланиш воситалари бундан мустасно) бошқариш ҳуқуқини беради.

2026 йилдан «А1» кичик тоифадаги ҳайдовчилик гувоҳномасини олиш учун талабгорларга ҳайдовчиларни тайёрлаш мажбурий ўқув дастурини ўтамасдан туриб тўғридан тўғри назарий ва амалий имтиҳонларни топшириш ҳуқуқи берилади. Бунда талабгорлар ўзларининг ихтиёрига кўра ўқув курсларида (онлайн ёки офлайн шаклда) ўқиши ёхуд мустақил тайёрланиши мумкин бўлади.

Қайд этилишича, «А1» тоифадаги ҳайдовчилик гувоҳномасини олиш учун автомактабда ўқиш шарт бўлмайди.

«А», «Б», «C», «Д» тоифадаги автомототранспорт воситаларидан бирини бошқариш ҳуқуқини берувчи миллий ҳайдовчилик гувоҳномасига эга бўлган шахслар «А1» кичик тоифадаги транспорт воситаларини тўғридан тўғри бошқариш ҳуқуқига эга бўлади.

«А1» кичик тоифадаги транспорт воситаларини бошқариш ҳуқуқини берадиган миллий ҳайдовчилик гувоҳномасини олиш учун назарий имтиҳонда 20 та саволдан камида 16 тасига тўғри жавоб берган ҳайдовчиликка номзодлар амалий имтиҳонга қўйилади.

Шунингдек, 3 ой муддат ичида йўл ҳаракати қоидалари, транспортни бошқариш хавфсизлиги ва бошқа йўналишлар бўйича зарур билим ва кўникмаларни шакллантиришга кўмаклашувчи электрон ўқув материаллари ишлаб чиқилиши лозим. Бу материаллар барча учун очиқ бўлади.