Иллюстратив фото

25 февраль куни Адлия вазирлиги томонидан ишлаб чиқилган Ўзбекистонда ҳомийлик фаолиятини амалга ошириш тартибини такомиллаштириш тўғрисидаги қонун лойиҳаси Олий Мажлис Қонунчилик палатасида депутатлар томонидан биринчи ўқишда қабул қилинди.

Қонун лойиҳасига кўра, эндиликда жисмоний шахслар фақат ўзи ёки яқин қариндоши учун хайрия йиғиши мумкин бўлади. Кўнгиллилар эса ўзига бегона бўлган шахслар манфаати учун хайрия йиғишда фақат эълон бериш орқали кўмаклашади.

Хайрия қутиси фақат нодавлат ташкилотлар ва бошқа ҳомийлик қилувчи ёки олувчи юридик шахслар томонидан ўрнатилиши белгиланган.

Шунингдек, нодавлат ташкилотлар ва бошқа ҳомийлик қилувчи ёки олувчи юридик шахслар нақд пул шаклида хайрияни фақат хайрия қутиси орқали йиғади. Хайрия қутиси жойлаштириладиган манзил олдиндан эълон қилинади, уни очишда гувоҳлар қатнашади ҳамда бу жараён видеотасвирга олиниб, жамоатчиликка эълон қилинади.

Хайрияларни йиғиш ҳамда хайрия қутиларини ўрнатиш тартибини бузганлик учун маъмурий жавобгарлик белгиланади.

«Қонун лойиҳасининг қабул қилиниши ҳомийлик хайрияларини йиғиш тартибини бузишнинг олдини олиш, ҳомийлик ташкилотлари фаолиятининг шаффофлигини таъминлаш ҳамда уларга нисбатан фуқароларнинг ишончини ортишига хизмат қилади», дейилади Олий Мажлис Қонунчилик палатаси хабарида.