Туркиянинг «Ризеспор» клубида ўйнаётган Ўзбекистон терма жамоасининг асосий ҳимоячиларидан бири Ҳусниддин Алиқулов жиддий жароҳат олди. Бу ҳақда клуб ўзининг расмий саҳифасида маълумот берди.

«Футболчимиз Алиқулов 2026 йил 19 январь куни ўтказилган “Гёзтепе” клубига қарши учрашувида чап тиззасини қайириб олган ва ўйинни давом эттира олмаган.

Ўтказилган тиббий кўрик ва текширувлар шуни кўрсатдики, чап тиззада ACL (олдинги хочсимон боғлам) йиртилиши, пателляр сублюксация (тизза қопқоғининг ярим чиқиши) ва бунга боғлиқ MPFL (тизза қопқоғи боғлами) шикастланиши, шунингдек ички ва ташқи менискларда йиртилиш, қон кетиши ва шиш аниқланган. Шу сабабли футболчини операция қилишга қарор қилинди», — дейилади клубнинг расмий баёнотида.

Шунингдек, Ҳусниддинни жарроҳлик амалиётидан ўтказиш ва уни қайта тикланиши учун камида 6 ой вақт керак бўлиши маълум қилинди. Бу шуни кўрсатадики, Ҳусниддин Алиқулов 2026 йилги Жаҳон чемпионатида Ўзбекистон терма жамоасига ёрдам бера олмайди.

Маълумот учун, Ҳусниддин жароҳати туфайли 2024 йилги Осиё кубоги мусобақасини ҳам ўтказиб юборган эди.