Ўзбекистон технологик металлар комбинати (ТМК) Европа муҳим хомашё альянси (ERMA)га расман аъзо бўлди. Бу орқали мамлакатимиз глобал критик минераллар бозорида янги босқичга қадам қўймоқда.

ERMA – Европа саноатининг стратегик ресурс сиёсатини белгиловчи муҳим платформалардан бири бўлиб, у Европа Иттифоқининг яшил технологиялар ва барқарор энергияга ўтиш режалари доирасида литий, вольфрам, молибден ҳамда нодир ер элементларини хавфсиз манбалардан етказиб беришни таъминлайди.

Аъзолик Ўзбекистон учун қатор муҳим имкониятларни очади. Жумладан, Европа Иттифоқи билан институционал мулоқотни мустаҳкамлаш, хомашёни чуқур қайта ишлаш ва экспорт салоҳиятини кенгайтириш йўлларини очади. Шунингдек, халқаро сертификатлаштириш жараёнларига қўшилиш орқали инвестицион жозибадорлик ошади, Европа миқёсидаги йирик лойиҳаларга фаол жалб этилиш имконияти яратилади.

Бу жараён Ўзбекистоннинг хомашё дипломатиясини ривожлантириб, мамлакатимизни ишончли ва стратегик ҳамкор сифатида танитишга хизмат қилади. Шунингдек, Европанинг Германия, Франция, Финляндия ва Австриядаги илғор илмий-технологик марказлари билан ҳамкорлик имкониятлари очилади.

ТМК учун эса бу аъзолик халқаро грантлар ва инвестициялар орқали янги молиявий механизмлардан фойдаланиш, қўшма тадқиқотлар олиб бориш ва инновацион технологияларни жорий этиш имконини беради. Бу маҳсулот сифатининг халқаро стандартларга етишини таъминлаб, ТМКни жаҳон бозорида рақобатбардош қилиши кутилмоқда.

ERMA директори Массимо Гаспарон ТМК билан ҳамкорликдан катта умид билдирар экан, «Биз ЭРМА мақсадларини амалга ошириш, шунингдек, Европа Иттифоқи ва Ўзбекистон ўртасидаги ҳамкорликни мустаҳкамлаш йўлида ТМК билан бирга ишлашни интиқлик билан кутмоқдамиз», — дея таъкидлади.

Бир сўз билан айтганда, бу аъзолик Ўзбекистонни оддий хомашё етказиб берувчидан инновацион ҳамкор мақомига олиб чиқмоқда.