Oʻzbekiston texnologik metallar kombinati (TMK) Yevropa muhim xomashyo alyansi (ERMA)ga rasman aʼzo boʻldi. Bu orqali mamlakatimiz global kritik minerallar bozorida yangi bosqichga qadam qoʻymoqda.

ERMA – Yevropa sanoatining strategik resurs siyosatini belgilovchi muhim platformalardan biri boʻlib, u Yevropa Ittifoqining yashil texnologiyalar va barqaror energiyaga oʻtish rejalari doirasida litiy, volfram, molibden hamda nodir yer elementlarini xavfsiz manbalardan yetkazib berishni taʼminlaydi.

Aʼzolik Oʻzbekiston uchun qator muhim imkoniyatlarni ochadi. Jumladan, Yevropa Ittifoqi bilan institutsional muloqotni mustahkamlash, xomashyoni chuqur qayta ishlash va eksport salohiyatini kengaytirish yoʻllarini ochadi. Shuningdek, xalqaro sertifikatlashtirish jarayonlariga qoʻshilish orqali investitsion jozibadorlik oshadi, Yevropa miqyosidagi yirik loyihalarga faol jalb etilish imkoniyati yaratiladi.

Bu jarayon Oʻzbekistonning xomashyo diplomatiyasini rivojlantirib, mamlakatimizni ishonchli va strategik hamkor sifatida tanitishga xizmat qiladi. Shuningdek, Yevropaning Germaniya, Fransiya, Finlyandiya va Avstriyadagi ilgʻor ilmiy-texnologik markazlari bilan hamkorlik imkoniyatlari ochiladi.

TMK uchun esa bu aʼzolik xalqaro grantlar va investitsiyalar orqali yangi moliyaviy mexanizmlardan foydalanish, qoʻshma tadqiqotlar olib borish va innovatsion texnologiyalarni joriy etish imkonini beradi. Bu mahsulot sifatining xalqaro standartlarga yetishini taʼminlab, TMKni jahon bozorida raqobatbardosh qilishi kutilmoqda.

ERMA direktori Massimo Gasparon TMK bilan hamkorlikdan katta umid bildirar ekan, “Biz ERMA maqsadlarini amalga oshirish, shuningdek, Yevropa Ittifoqi va Oʻzbekiston oʻrtasidagi hamkorlikni mustahkamlash yoʻlida TMK bilan birga ishlashni intiqlik bilan kutmoqdamiz”, — deya taʼkidladi.

Bir soʻz bilan aytganda, bu aʼzolik Oʻzbekistonni oddiy xomashyo yetkazib beruvchidan innovatsion hamkor maqomiga olib chiqmoqda.