Яқинда Ўзбекистон Республикаси Молия вазирлиги ҳузуридаги Суғурта бозорини ривожлантириш агентлиги, Қишлоқ хўжалиги вазирлиги ва «Ўзагросуғурта» АЖ вакилларидан иборат ишчи гуруҳнинг Испанияга ташрифи ташкил этилди.

Молия вазирлиги ҳузуридаги Суғурта бозорини ривожлантириш агентлиги ахборот хизмати хабарга кўра, Ўзбекистон делегацияси мамлакатимизнинг Испаниядаги элчихонаси кўмагида ушбу давлатнинг ривожланган қишлоқ хўжалиги суғуртаси бўйича бой тажрибасини ўрганиш мақсадида қатор давлат ва нодавлат ташкилотларида учрашувлар ўтказди. Бундан кўзланган асосий мақсад, илғор хорижий тажрибани ўзлаштириб, юртимиз қишлоқ хўжалиги соҳасида суғурталаш тизимини такомиллаштириш, замонавий стандартларга жавоб бера оладиган ва соҳада фаолият юритувчи тадбиркор ва фермерларнинг етиштирган ҳосилларини турли хавф-хатарлардан ҳимоялашнинг янгича механизмларини яратишдан иборат.

Шуни таъкидлаш муҳимки, ривожланган аграр давлатлар тажрибалари ўрганилганида, Испания давлати қишлоқ хўжалиги суғуртаси соҳасида 42 йиллик бой тажрибага эга эканлиги, ўз ўрнида ушбу давлатнинг суғурталаш тизими дунёнинг қишлоқ хўжалиги ривожланган бошқа давлатларида ҳам андоза сифатида тан олинганлиги ҳамда юртимиз билан иқлимий мутаносиблиги жиҳатидан яқинлиги ҳисобга олинди.

Илк расмий учрашув Испания Қишлоқ хўжалиги вазирлиги ҳузуридаги Аграр суғурта бўйича давлат агентлиги (ENESA) раҳбари Мигель Перес ва ижрочи директор Кармен Санчеслар билан бўлиб ўтди. Унда суғурталаш бўйича давлат ва хусусий сектор биргаликда фаолият олиб бориш механизми борасида фикр алмашилди.

Шунингдек, Иқтисодиёт ва рақамли трансформация вазирлиги ҳузуридаги Суғурта Компенсациялари консорциуми (CCS) директори ўринбосари Хосе Антонио Пуэрто билан учрашиб, қишлоқ хўжалиги суғуртаси соҳасида Консорциумнинг роли ва унинг фаолияти ҳақида маълумотлар олинди.

Шуни таъкидлаш ўринлики, юқори хатарли суғурта рискларни қайта суғурталаш билан шуғулланадиган ушбу ташкилотнинг аналогини Ўзбекистонда ҳам ташкил этиш орқали давлатнинг катта миқдордаги молиявий йўқотишларини олдини олиш мумкин.

унингдек, «Agroseguro» компанияси бошқаруви, «MAPFRE» суғурта компанияси ва Қишлоқ хўжалиги кооперативлари федерациясида ҳам ўзаро ҳамкорлик масалалари муҳокама этилди.

— Ўрганиш натижалари шуни кўрсатдики, қишлоқ хўжалиги маҳсулотларининг етарли миқдорда етиштирилиши бевосита давлатнинг озиқ-овқат хавфсизлигини таъминлайди, — дейди Суғурта бозорини ривожлантириш агентлиги директори ўринбосари Ботир Усмоналиев. — Шу боис қишлоқ хўжалиги суғуртасини давлат томонидан қўллаб-қувватланиши ҳамда давлат ва хусусий секторнинг биргаликда фаолият олиб бориши муҳим аҳамиятга эга. Бунинг учун Ўзбекистон Республикаси Қишлоқ хўжалиги вазирлиги тизимида қишлоқ хўжалиги суғуртаси билан бевосита алоқадор тизимни ҳамда қишлоқ хўжалиги рискларини қайта суғурталаш бўйича давлат томонидан кафолатланган қайта суғурта ташкилоти фаолиятини йўлга қўйиш орқали мамлакатда суғуртанинг ушбу йўналишини ривожлантириш мумкин.

Бўлиб ўтган мулоқотлар натижасида икки томонлама манфаатли натижаларга эришилди ҳамда келгусида агросуғурта соҳасини ривожлантириш юзасидан ўзаро ҳамкорликни йўлга қўйишга келишиб олинди. Бу борада Испания ҳукумати вакиллари доимо ёрдамга тайёр эканлигини билдирди.

Ишчи гуруҳ ўрганишларни давом эттирган ҳолда, соҳага тегишли ислоҳотларни амалга ошириш ва ҳукумат даражасида қонунчиликка таклифлар бериш учун Туркия давлатининг қишлоқ хўжалиги суғуртаси бўйича тўпланган тажрибасини ўрганишни режалаштирган.

Таъкидлаш жоизки, Ўзбекистон Республикаси Президентининг «2022 — 2026 йилларга мўлжалланган янги Ўзбекистоннинг тараққиёт стратегияси тўғрисида»ги Фармонининг 136-бандида қишлоқ хўжалигида давлат томонидан қўллаб-қувватлаш кўламини кенгайтириш ва суғурталашнинг янги механизмларини амалга ошириш белгилаб қўйилган. Унга кўра, қишлоқ хўжалигида суғурталаш тизимини такомиллаштириш, шу жумладан «Қишлоқ хўжалиги таваккалчиликларини суғурталаш тўғрисида»ги қонунини қабул қилиш вазифаси тегишли вазирлик масъулларига юклатилган.

Ўзбекистон делегациясининг Испанияга ташрифи мазкур Фармоннинг ижросини таъминлаш доирасида амалга оширилди.