Жорий йилнинг 4 — 7 сентябрь кунлари Олий Мажлис Сенати Раиси Танзила Норбоева бошчилигидаги Ўзбекистон делегацияси расмий ташриф билан Беларус Республикасига боради.

Ташриф мобайнида Ўзбекистон – Беларус бизнес доиралари ва тадбиркор аёллар биринчи бизнес-форуми бўлиб ўтади.

Форум доирасида «Тадбиркорликдаги аёллар – Беларус ва Ўзбекистон ўртасидаги ишбилармонлик ҳамкорлигини ривожлантириш салоҳияти» мавзусида ялпи мажлис, кўргазмалар ва олтита тематик секция йиғилишлари ташкил этилиши режалаштирилган.

Тадбирларда Ўзбекистон томонидан саноат корхоналари, қишлоқ ва фермер хўжаликлари, озиқ-овқат, фармацевтика саноати, маданий-гуманитар, шунингдек, туризм ва транспорт компаниялари вакиллари иштирок этадилар.

Форум якунида бир қатор муҳим ҳужжатлар, шу жумладан тижорий келишув ва шартномалар имзоланиши кўзда тутилган.

Эслатиб ўтамиз, 2022 йилнинг 29 июнь – 2 июль кунлари Олий Мажлис Сенати Раиси Танзила Норбоева бошчилигида Ўзбекистон тадбиркор аёллари делегацияси расмий ташриф билан Озарбайжон Республикасида бўлиб, Ўзбекистон ва Озарбайжон тадбиркор аёлларининг биринчи бизнес-форуми ўтказилган эди. Унинг натижаларига кўра, 54 млн доллардан ортиқ миқдорда шартнома ва меморандумлар имзоланган.