Фото: Божхона қўмитаси

Тошкент вилоятининг Қибрай туманида қўшни давлатдан тортилган яширин ер ости қувури аниқланди. У орқали бензин контрабандаси амалга оширилган, деб хабар бермоқда Божхона қўмитаси ахборот хизмати.

Қайд этилишича, кеча, 26 декабрь куни Божхона қўмитаси ва унинг Тошкент вилояти бўйича бошқармаси тезкор ходимлари томонидан Ўзбекистон ва Қозоғистоннинг тегишли ҳуқуқни муҳофаза қилувчи органлари билан ҳамкорликда қўшни мамлакатдан ноқонуний йўллар билан ёнилғи (бензин) маҳсулотини олиб ўтадиган трансчегаравий жиноий гуруҳ фош қилинган.

Ўтказилган тезкор-қидирув тадбирлари давомида Тошкент вилоятининг Қибрай туманида жойлашган қорамол фермаси кўздан кечирилганида, Қозоғистон ҳудудидан Ўзбекистон ҳудудига «бензин» ёнилғи маҳсулотларини ноқонуний ўтказишга мўлжалланган, тахминан 500 метр узунликдаги «яширин қувур» борлиги маълум бўлган.

Ҳозирда ҳолатга алоқадор бўлган шахслар бўйича тезкор-қидирув тадбирлари давом эттирилмоқда.