Яқинда Президентимиз Андижон вилоятига ташриф буюриб, ҳудуднинг ижтимоий-иқтисодий салоҳияти, инфратузилмасидаги улкан янгиланишлар ҳамда аҳоли ҳаёт сифатини оширишга хизмат қилаётган ислоҳотлар билан бевосита танишди. Ушбу ташриф нафақат вилоят, балки бутун Фарғона водийси учун стратегик аҳамиятга эга бўлган босқични бошлаб берди. Давлатимиз раҳбари томонидан Андижон шаҳри яқинида барпо этилаётган янги шаҳарчага буюк аждодимиз, саркарда, шоир ва мутафаккир Заҳириддин Муҳаммад Бобур номини бериш таклифи илгари сурилди. Ушбу ташаббус нафақат тарихий адолатни тиклаш, балки миллий ўзлигимиз, маданиятимиз ва тараққиёт стратегиямизни янги босқичга олиб чиқишнинг рамзий ифодасидир.

Заҳириддин Муҳаммад Бобур – Марказий Осиё тарихидаги энг серқирра шахслардан биридир. У Темурийлар сулоласининг вакили сифатида ҳарбий салоҳият, сиёсий донишмандлик ва адабий-маънавий етукликни ўзида мужассам этган. Бобур нафақат Ҳиндистонда улкан салтанат барпо этган давлат арбоби, балки жаҳон адабий меросига «Бобурнома»дек тенгсиз асарни ҳадя этган йирик мутафаккирдир. Бу асар ўзининг чуқур кузатувчанлиги, реалистик тафаккури ва тарихий фактларга бойлиги билан Шарқ адабиётида ноёб ўринга эга.

Бобур шаҳри – келажакда илм, маданият, туризм ва инновацион ривожланиш маскани сифатида шаклланиши кутилаётган ҳудуддир. Бу ерда нафақат замонавий инфратузилма, балки бобурий руҳ, тарихий-маданий қадриятлар уйғун ҳолда барпо этилади. Бу – Ўзбекистоннинг тарихий илдизлари ва замонавий тараққиёт ўртасида барқарор кўприк қуриш демакдир. «Бобур шаҳри» номи нафақат республика, балки халқаро майдонда ҳам кучли резонанс уйғотади. Бобур номи бугун Ҳиндистон, Покистон, Афғонистон, Туркия ва бошқа кўплаб мамлакатларда эҳтиром билан тилга олинади. У барпо этган Бобурийлар империяси асрлар давомида Шарқ ва Ғарб цивилизациялари ўртасида маданий кўприк бўлиб хизмат қилган.

Агар Ўзбекистонда Бобур номидаги шаҳар вужудга келса, бу халқаро миқёсда маданий дипломатия, зиёрат туризми, илмий ҳамкорлик ва ёшлар ўртасида тарихий меросни ўрганишга янги суръат бағишлайди. Бу ташаббус Бобур меросини БМТ, ЮНEСКО, ТУРКСОЙ каби нуфузли халқаро ташкилотлар доирасида тарғиб этишга замин яратади.

Бугун Ўзбекистонда олиб борилаётган ислоҳотлар – «аввал инсон, сўнгра ислоҳот» тамойили асосида, жамиятнинг маънавий юксалишига, ўз-ўзини англашига хизмат қилмоқда. Бобур шаҳри – ушбу стратегик ёндашувнинг ёрқин ифодаси сифатида қаралмоқда. Бу шаҳар келгусида нафақат архитектура ва технологиялар уйғунлиги, балки ўзбек миллатининг маданий тимсолига айланиши мумкин.

Бугунги глобаллашув даврида миллий ўзликни сақлаш, тарихий хотирани жонлантириш ва уни замонавий тараққиёт билан уйғунлаштириш давлат сиёсатининг устувор йўналишларидан бирига айланди. «Бобур шаҳри» номли янги масканнинг ташкил этилиши – бу борада катта ижтимоий, сиёсий ва маданий аҳамиятга эга ташаббусдир.

Заҳириддин Муҳаммад Бобур каби буюк сиймолар номини абадийлаштириш орқали биз нафақат ўтмиш олдидаги бурчимизни адо этамиз, балки келажак авлодга йўл кўрсатамиз.

Дилшодбек РУСТАМОВ,

Андижон давлат чет тиллари институти ректори.