Тошкент шаҳрида 24 ёшли йигит крипто-активлар айланмаси соҳасидаги қонунчиликни бузиш бўйича айбланиб, маъмурий жавобгарликка тортилди. Бу ҳақда «Халқ сўзи»га Тошкент шаҳар судидаги манбаси хабар берди.

Билдирилишича, жорий йилнинг 1 июнь куни фуқаро Н.А. Тошкент шаҳар ИИББ котибиятига ариза билан мурожаат қилган. Шу мурожаат юзасидан олиб борилган терговга қадар текширув ишлари давомида Сурхондарё вилояти Узун туманида туғилган, Термиз давлат университетининг 24 ёшли битирувчиси И.Н.га тегишли телефон ҳамда банк пластик картасидан крипто-активларнинг ноқонуний фаолияти билан шуғулланилгани аниқланган.

Мазкур ҳолат юзасидан кеча, 7 июнь куни ЖИБ Чилонзор тумани судида И.Н.га тегишли иш кўриб чиқилган. Суд мажлисида сурхондарёлик 24 ёшли талаба айбини тан олиб, крипто-активни Telegram ижтимоий тармоғида йиғганини, ноткоинни 800 минг сўмга сотганини ҳамда бунинг ноқонуний эканини билмаганини айтиб, ўзига нисбатан енгиллик беришни сўраган.

Суд йигитни Маъмурий жавобгарлик тўғрисидаги кодекснинг 155−4-моддаси (Крипто-активлар айланмаси соҳасидаги қонунчиликни бузиш) 1-қисмида назарда тутилган ҳуқуқбузарликларни содир этганликда айбли деб топиб, унга нисбатан 10 сутка маъмурий қамоқ жазосини тайинлаган.

Шунингдек, И.Н.га тегишли телефон ва банк картаси тегишли тартибда йўқ қилиниши белгиланган.