Иллюстратив фото

Жаҳон бокс ассоциацияси (WBA) иккинчи энг енгил вазн тоифаси чемпиони, япониялик Наоя Иноуэга Муроджон Аҳмадалиевдан мажбурий ҳимоя жанги ўтказишга буйруқ берганди. Аммо «кунчиқар юрт вакили» жангга чиқиш ниятида эмас.

Ташкилот томонларга расмий мактуб юбориб, ҳар икки жамоага жанг ҳақида хабар берди. Музокара учун тақдим этилган 30 кун муҳлат 14 июль куни тугайди.

WBAнинг расмий буйруғи бўлишига қарамай, Наоя Иноуэ Аҳмадалиев билан жанг қилмай, камарни вакант қолдириши мумкин

«Навбатдаги жангнинг манзили аниқ. Барча камарларни ушлаб туриш қийин бўлади. Шу сабабли камарни вакант қилишимиз мумкин», деган Иноэнинг менежери Хидеюки Охаши.

Хидеюки Охаши WBA талабини қондиришнинг иложи йўқлигини, чунки сентябрь ойида бошқа рақибга қарши чемпионликни ҳимоя қилиш бўйича келишув аллақачон якунланиш арафасида эканлигини айтмоқда.

«Иноуе тўртта камарни бир вақтнинг ўзида ушлаб туришни давом эттириши шарт эмас. WBA унвонидан маҳрум бўлиш қўрқинчлимас» дейди менежер.

«Top Rank» промоутерлик компанияси раҳбари Боб Арум ҳам мижози Наоя Иноуэга боғлиқ кейинги режалар билан ўртоқлашди.

«Иноуэ шу йилнинг 9 сентябрь куни Японияда Ти Жей Дохени билан жанг қилишни режалаштирмоқда. Дохени Японияда жуда машҳур, бу катта аҳамиятга эга. Кейин эса Наоя IBF камарини Сэм Гудмандан ҳимоя қилишга уриниб кўради. Ундан кейин эса ярим енгил вазн тоифасига кўтарилади. Энг ёмон вазиятда Наоя WBA камарини йўқотади. Бу эса биз учун йўқотиш ҳисобланмайди», деган Арум.

Регламентга кўра, чемпион камарини қўлга киритган кундан бошлаб 9 ой ичида мавжуд бўлган энг яхши даъвогарга қарши унвонини ҳимоя қилиши керак.

Иноуэ 2023 йилнинг 26 декабрида чемпионликни қўлга киритган ва унинг мажбурий ҳимояси шу йилнинг 25 сентябридан кечиктирмай ўтказилиши керак. WBA йўналишидаги мажбурий даъвогар эса айнан ҳамюртимиз бўлиб турибди.

Маълумот учун, WBA ва IBF йўналишларида собиқ жаҳон чемпиони Муроджон Аҳмадалиев АҚШда машғулотларни давом эттирмоқда.

«Бу ажойиб жанг бўлади. Иноуэ ҳақиқий монстер, лекин мен унинг олдинги рақибларидан ақлли ва кучлироқман. Кел, жанг қилайлик, чемпион», дея Иноуэга мурожаат қилган Аҳмадалиев. Шунга қарамай, япониялик боксчи ҳозирча ҳамюртимизга рўбарў келишдан ўзини тиймоқда.

Маълумот учун, Иноуэ навбатдаги жангини сентябрь ойида Токиода Сэм Гудманга қарши ўтказиши лозим эди. Бироқ, Гудман июль ойида Австралияда рингга кўтарилади. Шу сабабли, Иноуэга сентябрь ойида WBO йўналиши бўйича 2-рақамли жангчи Ти Же Дохени рақиб бўлиши мумкин.