Яқинда Камолиддин Беҳзод номидаги Миллий рассомлик ва дизайн институтида Ўзбекистон Республикаси Олий Мажлиси Сенатининг Хотин-қизлар ва гендер тенглик масалалари қўмитаси, «Ҳадичаи Кубро» аёллар, қизлар ўрта махсус ислом билим юрти ходимлари иштирокида аҳоли, айниқса, ёшлар ўртасида кийиниш маданияти тарғиботини ташкил этишга қаратилган «Нафосат» фестивали доирасида ёш дизайнерлар ва соҳа мутахассислари билан давра суҳбати бўлиб ўтди.

Тадбир аввалида институт профессор-ўқитувчилари ва талаба-ёшлар томонидан «Тасвирий санъатда ўзбек аёли тимсоли» мавзусидаги ижодий ишлар кўргазмаси ташкил этилди. Мазкур кўргазмадан Чори Бекмировнинг «Анора», Зиёдилла Фармоновнинг «Қуроқчи момо», «Келин», «Чеча», Чарос Пайзиеванинг «Аёллар сиймоси», Бахтиёр Обидовнинг «Келинчак», Бахтиёр Назаровнинг «Сурхондарёлик аёл», Сарвиноз Қосимованинг «Буюк сиймолар ва автопортрет» ва бошқа кўплаб эътиборга молик асарлар ўрин олди.

Давра суҳбатида ёшлар тарбиясида кийиниш маданияти ҳам муҳим аҳамият касб этиши, айниқса, талаба-қизлар жамиятимизнинг зиёли вакилалари сифатида бу борада барчага намуна бўлишлари лозимлиги таъкидланди. Қолаверса, бугунги кунда аёл-қизларимизнинг кийиниш маданиятини янада юксалтириш борасида фикр-мулоҳазалар билдирилди.

Тадбир доирасида «Нафосат – 2021» фестивали номинациялари бўйича модалар намойиши ташкил этилди. Мазкур намойишдан ўзбек миллий либослари билан бир қаторда бугунги кунда ўқиш ва ишда кийиш мумкин бўлган қулай ва бежирим либослар ўрин олди.

Давра суҳбати иштирокчилари ўзларини қизиқтирган барча саволларга мутахассислардан атрофлича жавоб олди.