Симсиз зарядловчи қурилмалар тобора оммалашиб бормоқда. Бу каби қурилмалардан, айниқса, ёшлар кўпроқ фойдаланмоқда. Талаб юқорилиги учун эса бозорда иш столи ва машиналар учун турли кўринишдагилари тақдим этилмоқда. Шу сабабли ҳам шу каби қурилмаларнинг хавфсизлиги ва самарадорлиги Роскачество рақамли экспертиза маркази мутахассислари томонидан ўрганилди.

Марказ раҳбари Сергей Кузменкога кўра, симсиз қурилмалар смартфонни қувватлантириш жараёнини сезиларли даражада соддалаштиради. Бироқ, қурилмалар камчиликлардан холи эмас. Хусусан, асосий муаммо — паст самарадорлик.

Шунингдек мутахассис, қурилмани ишончли дўкондан юқори сифатлисини сотиб олиш лозимлигини қайд этади.

«Паст сифатли зарядловчилардан фойдаланиш ёки смартфонни ҳаддан ташқари қизиб кетиши батареяни секин-асталик билан ўлдиради. Чунки деярли барча замонавий смартфонлар литий-ионли батареялар билан жиҳозланган бўлиб, улар ҳароратга ҳаддан ташқари сезгир», деб тушунтиради муаллифлар.

Мутахассислар батареянинг ишлаш муддатини узайтириш учун ҳарорат талабларига риоя қилишни тавсия этади. Мисол учун пиёда юргандан сўнг телефонни дарҳол симсиз қурилмада қувватлантиришга уринмаслик лозим. Сабаби гаджет қизиб кетган бўлиши мумкин.

Симсиз қурилмалардан фойдаланишнинг камчиликларидан бири зарядлаш жараёнининг узоқроқ давом этиши билан боғлиқ. Ушбу қурилма симли билан солиштирганда зарядлаш учун 30 фоиз кўпроқ вақт талаб қилади. Зарядловчи смартфон ишлаб чиқарувчиси талабларига жавоб бермаса ёки телефон нотўғри жойлаштирилган бўлса, зарядлаш тезлиги янада пасаяди.

Муаллифларнинг қайд этишича, симсиз зарядлаш самарадорлиги кўп жиҳатдан қурилма ва смартфоннинг жойлашувига боғлиқ. Уларнинг ўзаро таъсир доираси қанчалик катта бўлса, смартфон тезроқ зарядланади.