Швейцариянинг Давос шаҳрида ўтказилаётган Жаҳон иқтисодий форумида нутқ сўзлаган АҚШ президенти Дональд Трамп Гренландия устидан назоратини қўлга киритиш учун ҳарбий куч ишлатиш нияти йўқлигини маълум қилди.

«Менинг асосий ваъдам шу — мен зўравонлик ишлатмайман. Мен шунчаки бир парча муз истайман», — деган Трамп НАТО бош котиби Марк Рюттега мурожаат қилар экан.

Шунингдек у, АҚШ Гренландия устидан назоратни исташини, Америка Иккинчи жаҳон урушидан кейин бу ҳудуддан воз кечганини ҳам қўшимча қилган.

АҚШ президенти Гренландияни сотиб олиш масаласига тўхталиб, дунё ҳамжамияти ва НАТО иттифоқчиларига қарата сиз «ҳа» дейишингиз мумкин, биз жуда миннатдор бўламиз, аммо «йўқ» десангиз биз буни эслаб қоламиз, дея ўз нутқини якунлаган.

Қўшма Штатлар раҳбари Украинадаги урушга ҳам тўхталиб ўтиб, ҳар ойда у ерда 30 минг нафаргача ҳарбий ҳалок бўлаётганини, можарони «қонли қирғин» ҳамда Иккинчи жаҳон урушидан кейинги энг йирик тўқнашув сифатида баҳолаган.

Дональд Трамп Россия президенти Владимир Путин билан урушни якунлаш бўйича музокаралар давом этаётганини, шу кунларда Украина президенти Владимир Зеленский билан учрашиши мумкинлигини ҳам билдирган.