Дунёнинг энг бой одами Илон Маск ўзининг «SpaceX» ракетасининг олтинчи синовини Америка Қўшма Штатларининг сайланган президенти Дональд Трамп билан бирга кўриш учун борди.

«CНН» хабарига кўра, Трампнинг иштироки Маскнинг Трамп орбитасидаги роли ортиб бораётганининг яна бир мисолидир. Трамп 5 ноябрда бўлиб ўтган АҚШ президентлик сайловларида ғалаба қозонганидан бери Маск Флорида штатидаги Палм-Бичдаги сайланган президентнинг Мара-Лаго мулкида доимий бўлиб келган.

У Трампга янги маъмуриятга номзодлар бўйича маслаҳат берди ва сайланган президентнинг Украина президенти Владимир Зеленский билан телефон суҳбатида иштирок этгани маълум. Маск, шунингдек, ўтган чоршанба куни Вашингтондаги Вакиллар палатасининг республикачилар билан учрашуви учун Трамп билан бирга учиб кетди ва шанба куни Нью-Йоркдаги «Madiosn Square Garden»да бўлиб ўтган «Ultimate Fighting Championship»да бирга бўлган.

Яқинда Трамп Маскни сиёсий қўллаб-қувватлови учун мукофотлади ва уни республикачи Вивек Рамасвами билан бирга янги ташкил этилган Ҳукумат самарадорлиги департаментига ҳукумат харажатларини қисқартириш бўйича маслаҳат бериш учун тайинлади.

Маскнинг бизнеслари унинг Трамп билан яқин алоқаларидан шахсан фойда олиши мумкин. Марсда колония қуришни ўз олдига мақсад қилган SpaceX миллиардлаб долларлик давлат шартномаларига эга. У, шунингдек, Тесла электромобилларида мавжуд бўлган автоном ҳайдаш билан боғлиқ хавфсизлик муаммолари бўйича АҚШ федерал регуляторлари билан кураш олиб борди.

Бу икки шахс ҳар доим ҳам бунчалик яқин бўлмаган. Трамп ўз нутқларида Маскни масхара қилган бўлса, миллиардер Трампни президентлик учун кексалигини айтган. Аммо сайлов олдидан Трамп суиқасддан омон қолганидан кейин вазият ўзгарди. Маск Трампни қўллаб-қувватлади ва Республикачиларнинг сайловолди ташвиқотида асосий шахсга айланди. Трамп эса сайловолди ташвиқоти пайтида Маскнинг космик ютуқлари ҳақида гапира бошлади.