Фото: Reuters

Франция президенти Эммануэль Макрон Россия президенти Владимир Путин билан мулоқот қилиш нияти борлигини маълум қилди. У бу ҳақида «France 2» телеканалига берган интервьюсида айтиб ўтган.

Макроннинг таъкидлашича, Россия етакчиси билан мулоқот қилиш жараёнини йўлга қўйиш зарур.

«Мақсадимиз Украинанинг таслим бўлишисиз тинчликка эришиш», — деган Франция президенти.

Шунингдек у, қисқа муддатда Украинани қўллаб-қувватлаш давом эттирилиши кераклигини ҳам қўшимча қилган.

Аввалроқ, 2025 йилнинг декабрь ойида Эммануэль Макрон Европа учун Владимир Путин билан мулоқотни қайта тиклаш фойдали бўлишини таъкидлаган эди. Ўз навбатида, Россия президенти матбуот котиби Дмитрий Песков Путин ҳам Макрон билан мулоқот қилишга тайёр эканини билдирган. Песков бу суҳбат амалга ошган тақдирда маъруза шаклида эмас, балки бир-бирининг позицияларини тушунишга қаратилган бўлиши лозимлигини ҳам қўшимча қилган.

Маълумот учун, Эммануэль Макрон Владимир Путин билан тўғридан-тўғри алоқада бўлиб келаётган кам сонли Европа раҳбарларидан бири ҳисобланади. Президентлар ўртасидаги сўнгги телефон суҳбати 2025 йил 1 июль куни бўлиб ўтган ва икки соатдан ортиқ давом этган. Ушбу мулоқот чоғида Макрон Путинни Украинада ўт очишни тўхтатишга ва можарога барҳам бериш учун музокараларни бошлашга чақирганди.