Кеча, 7 февраль куни Англия Премьер лигасининг 25-тур ўйинлари давом эттирилди. Кун доирасидаги дастлабки баҳсда «Манчестер Юнайтед» клуби ўз майдонида Лондоннинг «Тоттенхэм» жамоасини қабул қилди.

Таъкидлаш керакки, «Манчестер Юнайтед» жамоаси клубни Майкл Каррик қабул қилиб олгандан бери кетма-кет муваффақиятли ўйинлар ўтказмоқда. Жамоа дастлаб «Манчестер Сити» ва «Арсенал» каби жамоаларни мағлуб этганди. Бу гал «Тоттенхэм» ҳам «қизил иблислар»га муносиб қаршилик кўрсата олмади.

Ўйинда ҳисоб 38-дақиқада Брайан Мбеумо томонидан очилди. Биринчи бўлим 1:0 ҳисобида якунланди. Иккинчи бўлимнинг 81-дақиқасида Бруно Фернандеш «манчестерликлар»нинг иккинчи голини киритди. Шу тариқа баҳс Каррик жамоасининг ғалабаси билан якунланди. Ушбу ғалаба эвазига «Манчестер Юнайтед» турнир жадвалидаги тўртинчи ўрнини мустаҳкамлаб олди.

Шунингдек, турнир жадвалида 3-ўринни эгаллаб турган «Астон Вилла» клуби бу турда очко йўқотди. Жамоа тур доирасида «Борнмут» клуби меҳмони бўлди. Баҳс 1:1 ҳисобида якунланди. Голларга «Астон Вилла»дан Морган Роджерс, «Борнмут»дан Райан муаллифлик қилди.

Сўнгги тўртта ўйинда ғалаба нима эканини билмай келган «Ньюкасл» клуби бу турда ҳам мағлуб бўлди. Фақат қандайдир гранд клубга эмас, мусобақа жадвалида 7-ўринда бораётган «Брентфорд» жамоасига. Ғолиблар сафида голларга Данга Уаттара, Игор Тиаго ва Виталий Жанет муаллифлик қилди. «Ньюкасл»нинг жавоб голлари эса Бруно Гимараэш ва Ботман Свен ҳисобига ёзилди.

Мусобақа жадвалида бешинчи ўринни эгаллаб турган «Челси» жамоаси тур доирасида, мусобақа жадвалида сўнгги ўринни эгаллаб турган «Вулверхэмптон» клуби меҳмони бўлди. «Аристократлар» етакчиси Коул Палмер биринчи бўлимнинг ўзидаёқ 3 та тўп киритиб, ўйин тақдирини ҳал қилди. Иккинчи бўлимда Толу Арокодаре мезбонларнинг ягона жавоб голини киритди.

Турнир жадвалида биринчи ўринни эгаллаб турган «Арсенал» жамоаси эса тур доирасида «Сандерленд»ни қабул қилди ва катта қийинчиликсиз навбатдаги ғалабасини тантана қилди. Ўйинда ҳисоб 42-дақиқада Мартин Субименди томонидан очилди. Иккинчи бўлимнинг 66 ва 90+3 дақиқаларида захирадан ўйинга қўшилган Виктор Гёкереш 2 та тўп киритди. Шу тариқа ўйин 3:0 ҳисобида якунланди.

Бугун АПЛда 25-тур ўйинлари якунланади. Турнинг марказий ўйини ҳам 8 февраль оқшомида бўлиб ўтади. Унда «Ливерпуль» клуби ўз майдонида «Манчестер Сити»ни қабул қилади.