«Манчестер Сити» клуби расмий сайти ҳамда ижтимоий тармоқлардаги саҳифалари бразилиялик ҳимоячи Витор Реис жамоага келиб қўшилганини эълон қилди.

19 ёшли футболчи тўрт ярим йиллик шартнома асосида «шаҳарликлар» таркибига ўтди. 2029 йилнинг ёзигача амал қиладиган шартномани тузиш учун «Ман Сити» 35 миллион евро тўлайди.

Реис бугунга қадар Бразилиянинг «Палмейрас» жамоаси сафида тўп сурган. Футболчи янги жамоасида 22-рақамда тўп суради.

«Витор Реис — дунёдаги энг умидли ёш ҳимоячилардан бири ва биз уни жамоага олиб келганимиздан хурсандмиз», — дейди клуб спорт директори Чики Бегиристайн.

Эслатиб ўтамиз, «Манчестер Сити» клуби ҳамюртимиз Абдуқодир Ҳусанов трансферини ҳам эълон қилган эди.

Эътиборлиси шундаки, Абдуқодир Ҳусанов ҳам, Витор Реис ҳам марказий ҳимоячи саналади.

Муҳим савол туғилади: Абдуқодир Ҳусанов ҳамда Витор Реис ўз позицияси учун рақобат олиб борадими ёки ўзаро тандем ҳосил қиладими? Бу энди вақт масаласи.

Тахминларга кўра, Абдуқодир Ҳусанов ҳамда Витор Реисни мухлислар билан таништирув тақдимоти 25 январь куни АПЛ доирасида бўлиб ўтадиган «Челси» клубига қарши баҳсдан олдин «Этиҳад» стадионида бўлиб ўтади.