Англиянинг «Ливерпуль» клуби футболчиси Диого Жотанинг фожиали ўлимидан сўнг, унинг 20-рақамдаги футболкаси «абадийлаштирилиши» маълум қилинди. Бу ҳақда клуб расмий сайти хабар берди.

Аввалроқ, Португалиялик ҳужумчи Диого Жота ва унинг укаси, Португалиянинг «Пенафиел» клуби футболчиси бўлган 26 ёшли Андре Жота Испаниянинг Замора вилоятида рўй берган йўл-транспорт ҳодисасида ҳалок бўлган эди.

Маълумотларга кўра, Диого Жота бошқарган «Lamborghini Urus» автомобили Замора вилоятидаги Санабрия туманида бошқа автомобилни қувиб ўтаётганда шиналардан бири ёрилиб кетган. Натижада машина йўлдан чиқиб кетиб, ёнғинга учраган. Автомобилда Жотанинг укаси Андре ҳам бўлган ва у ҳам воқеа жойида ҳалок бўлган.

«Ливерпуль» клуби расмий баёнотида Жотанинг 20-рақамдаги футболкаси унинг клубдаги хизматлари учун «ҳақли равишда абадийлаштирилиши» қайд этилган. Клуб Жотанинг айнан 2024/25 йилги мавсумдаги ғалабасига қўшган ҳиссасини, хусусан, унинг Мерсейсайд дербисидаги ғалаба голи билан ёдга олди.

Айни вақтда «Ливерпул» мухлислари Жотанинг 20-рақамдаги футболкасини бутунлай муомаладан чиқаришни талаб қилмоқда. Уларнинг фикрича, бу қаҳрамон футболчига ҳурмат ва миннатдорчилик рамзи бўлиши керак. «Футбол ҳозир энг муҳими эмас, лекин умид қиламанки, клуб 20-рақамни абадий нафақага чиқаради», — дея ёзади мухлислардан бири ижтимоий тармоқларда.

«Ливерпуль» клуби бош мураббийи Арне Слот ҳам Жотанинг ўлими юзасидан баёнот бериб, бутун жамоа ва мухлислар унинг оиласига ҳамдард эканлигини билдириб ўтди. «Диого нафақат ажойиб футболчи, балки меҳрибон инсон ва содиқ дўст эди», — деди у.

Клуб собиқ мураббийи Юрген Клопп эса ижтимоий тармоқдаги саҳифасида чуқур қайғусини изҳор этиб, «Бундай пайтда гап топиш қийин. Бу фожиани тушуниш ҳам, қабул қилиш ҳам қийин», — дея ёзиб қолдирди.

Диого Жота яқинда, 22 июнь куни узоқ йиллик севгилиси Руте Кардосога уйланганди.