Машҳур немис мутахассиси Юрген Клопп катта футболга мураббий сифатида қайтишга қарор қилди. «La Stampa» нашрининг ёзишича, у Италия «А» Сериясининг «Рома» клуби билан келишувга эришган.

Маълумотларга кўра, Клопп жорий мавсум якунида Рим клуби бош мураббийи лавозимини тарк этаётган Клаудио Ранерининг ўрнини эгаллайди. Бу «Рома» сафида тўп сураётган Элдор Шомуродов учун катта имконият бўлиши мумкин.

Юрген Клопп 2024 йил ёзида узоқ йиллик фаолиятдан сўнг «Ливерпул» клубини тарк этган эди. У «Энфилд»да 9 йил давомида ишлаган ва бу даврда клуб билан Чемпионлар Лигаси, Англия Премер Лигаси ва бошқа нуфузли совринларни қўлга киритган.

2025 йил бошидан Клопп «Red Bull» компаниясининг футбол тизимида фаолият юритаётган эди, аммо энди мураббийлик фаолиятига қайтиш учун бу лавозимни тарк этишга қарор қилган.

Айни пайтда «Рома» Италия «А» Серияси турнир жадвалида 5-ўринни эгаллаб турибди. Клуб 66 очко билан Чемпионлар Лигаси йўлланмаси учун курашни давом эттирмоқда. Агар чемпионатнинг якуний турида «Рома» «Торино» устидан ғалаба қозонса ва «Ювентус» «Венеция»га қарши баҳсда очко йўқотса, римликлар ЕЧЛ йўлланмасини қўлга киритиши мумкин.

Агар Клопп расмий равишда «Рома» бош мураббийига айланса, бу клуб учун янги босқич бўлади. Айниқса, жамоа таркибидаги ёш ва истеъдодли футболчиларнинг, хусусан Элдор Шомуродовнинг ўйини янада юқори даражага кўтарилиши кутилмоқда. Юрген Клоппнинг тажрибаси ва лидерлик қобилияти «Рома»га спорт натижалари ва жамоавий руҳ борасида катта ҳисса қўшиши мумкин.