Хитой иқтисоди рекорд пасайишдан сўнг жорий йилнинг иккинчи чорагида 3,2 фоизга ўсган.  Бу ҳақда BBC хабар берди. 

Дунёнинг иккинчи иқтисоди бўлган Хитойда коронавирус сабаб карантин амал қилган биринчи чоракда ўсиш суръати кескин тушиб кетган эди. Аммо шу ҳафта эълон қилинган ялпи ички маҳсулот (ЯИМ) ҳажмига доир рақамлар Хитой иқтисоди апрель — июнь ойларида яна ўсишни бошлаганини кўрсатяпти. Хитой ўз иқтисодини қайтадан ишга тушираркан, дунё ушбу рақамларни яқиндан кузатмоқда. Охирги рақамлар экспертлар башорат қилганидан каттароқ.

Бу Хитой амалда техник рецессия сифатида билинган кетма-кет икки чоракдаги негатив ўсишни четлаб ўтишини англатади. Жорий йилнинг илк чорагида Хитойдаги иқтисодий ўсиш суръати 6.8 фоизга тушган, бу ялпи ички маҳсулот ҳажмини ҳисоблаш бошланганидан буён энг катта тушиш бўлган. Хитой вирусни жиловлаш мақсадида қаттиқ чораларга кўл ураркан, кўпгина фабрика ва бизнеслар ёпилиб қолган. Ҳукумат иқтисодни жонлантириш учун қатор чоралар кўрган, жумладан, солиқ имтиёзлари берган.

Манбанинг ёзишича, ҳозирда Хитойдаги фабрикалар жонланиб қолган, ҳукумат эълон қилган чоралар иш бераётир. Аммо чакана савдо Хитой ҳукумати умид қилганичалик жонланмаяпти. Чакана савдо рақамлари иккинчи чоракда ҳам тушган, одамларни пул сарфлашга ундаш осон бўлмаяпти. Иқтисод қайтадан оёққа туришни бошларкан, АҚШ билан кескинлик ҳам, айниқса, Гонгконг масаласида ортмоқда​.

Май ойида Хитой коронавирус боис 2020 йил учун иқтисодий ўсиш мўлжалини эълон қилмаслигини айтган эди. Хитой 1990 йилдан буён биринчи марта ўзи учун ялпи ички маҳсулот ўсиш режасини эълон қилмаган. Хитой миллий статистика идорасига кўра, жорий йилнинг биринчи ярмида мамлакатда иқтисодий ўсиш суръати 1,6 фоизга пасайган.