Кўкдала туманининг чекка ҳудудларидан бири бўлган Галабек қишлоғидаги оилавий шифокорлик пункти биноси ўта таъмирталаб ҳолатга келиб қолган, бу эса тиббий хизмат сифати билан боғлиқ кўплаб муаммоларга сабаб бўлаётганди.

Жорий йилда тегишли дастур асосида муассаса тўлиқ қайта таъмирланиб, замонавий қиёфа касб этди. Зарур инвентар ва тиббий технологиялар, ускуналар билан жиҳозланди.

— Ушбу тиббиёт муассасаси Наймансарой ва Шўрқудуқ маҳаллалари таркибига кирувчи ўнга яқин кичик қишлоқлар аҳолисига хизмат қилади, — дейди фахрий ўқитувчи Нишон Жабборов. — Аввал бу ерда зарур шарт-шароитлар йўқ эди. Бугун эса яратилган имкониятлар бизни хурсанд қилмоқда.

Мустақиллигимизнинг 34 йиллиги арафасида замонавий тиббиёт муассасасининг фойдаланишга топширилиши ҳудуд аҳли учун ҳақиқий байрамга айланиб кетди.

Тантанали тадбирда сўзга чиққанлар томонидан бугун мамлакатимизда инсон қадрини юксалтиришга қаратилаётган эътибор, бу борада амалга оширилаётган кенг қамровли ислоҳотлар ҳақида тўхталиб ўтилди.

Энг улуғ, энг азиз байрамимиз муносабати билан Кўкдалада яна ўнлаб янги объектлар, жумладан, 3 та давлат мактабгача таълим ташкилоти биноси, Санэпидқўмитанинг туман бўлими ҳамда Агробанк ва Халқ банкининг Кўкдала банк хизматлари маркази бинолари ҳам фойдаланишга топширилди.

Жаҳонгир БОЙМУРОДОВ

«Халқ сўзи».