«Наполи» жамоаси бош мураббийи Антонио Конте ёзги трансфер ойнасида таркибни кучайтириш мақсадида «Ливерпуль»дан икки футболчини харид қилишни режалаштирмоқда. Бу ҳақда «La Repubblica» нашри хабар берди.

Нашрга кўра, Италия клуби раҳбарияти Контега трансферлар бўйича тўлиқ қўллаб-қувватлашга тайёр. Маълум қилинишича, Конте жамоасини янги ҳужумчи ва қанот футболчиси билан тўлдирмоқчи. Неаполликлар айнан «Ливерпуль» сафидаги Дарвин Нуньес ва Федерико Кьезани асосий нишонга айлантирган. Конте айниқса Нунеснинг ўйин услубига «ошиғи» бўлиб, у билан боғлиқ музокаралар бошлаб юборилган.

Хабарларда айтилишича, Конте бошчилигидаги клуб бу икки футболчи бўйича «жиддий алоқалар» ўрнатган ва улар «барқарор нишонлар» сифатида кўрилмоқда. Айниқса, Кевин де Брёйне билан шартнома имзолангани ортидан, Нунес ва Кьеза цингари юқори даражадаги футболчилар жамоани бутунлай ўзгартириб юбориши мумкинлиги таъкидланмоқда.

«Ливерпуль» жамоаси эса ўз навбатида ёзда яна бир қанча трансферларни амалга оширишни режалаштирган. Клуб ҳозирда Флориан Вирц ва Милош Керкез билан шартнома имзолаш арафасида, Жереми Фримпонг эса аллақачон жамоага қўшилган. Бундан ташқари, «қизиллар» ҳужум чизиғини кучайтириш мақсадида Александр Исак ва Уго Экитике каби футболчиларга қизиқиш билдирмоқда.

Дарвин Нуньеснинг трансфери борасида «Ливерпуль» очиқ позицияни эгаллаган: агар мос таклиф бўлса, клуб уни сотишга тайёр. Шу билан бирга, жамоа Нуньес ўрнини босадиган футболчи топилишига ҳам катта эътибор қаратмоқда. Клуб 85 миллион фунт стерлинг (қўшимчалар билан) эвазига сотиб олинган уругвайлик футболчи учун шу миқдорга яқин нархни қайтариб олишни истамоқда.

Федерико Кьеза борасида эса вазият бироз бошқачароқ. Узоқ вақтдан бери уни Италияга қайтиш истагида бўлган футболчи сифатида кўрилаётган бўлса-да, «Ливерпул»даги ички манбалар мураббий Арне Слот уни жамоада фойдали ўйинчи сифатида кўраётганини билдирган.