Шимолий Корея Жанубий Корея томонидан илгари сурилаётган ҳеч қандай таклифга қизиқмайди ва Сеул билан музокара олиб бориш ниятида эмас. Бу ҳақда КХДР президенти Ким Чен Иннинг синглиси, мамлакатдаги ҳукмрон партиянинг марказий қўмитаси раиси ўринбосари Ким Ё Чжоннинг Корея Марказий ахборот агентлиги (KCNA)да эълон қилинган баёнотида маълум қилинган.

Бу Шимолий Корея томонидан Ли маъмуриятига оид биринчи расмий баёнот ҳисобланади, деб ёзмоқда “The Korea Times”. Гап шундаки, Жанубий Корея Президенти Ли Чжэ Мён Пхеньянга ҳарбий зиддиятни юмшатиш ва икки Корея ўртасидаги алоқаларни яхшилаш учун музокараларни қайта бошлаш таклифи билан чиққан эди.

“Ўтган ойда президентлик лавозимини эгаллаган Ли Чжэ Мён биз билан қарама-қаршиликни давом эттираётган Жанубий Корея ва АҚШ иттифоқига кўр-кўрона эргашган ўзидан олдинги раҳбардан мутлақо фарқ қилмайди”, деган Ким.

Унинг қўшимча қилишича, Ли ҳукумати эътиборимизни жалб этишга ҳарчанд уринмасин, Шимолий Кореянинг Жанубий Кореяга нисбатан позицияси ўзгармайди.

“Мен яна бир бор очиқ айтаман: биз Сеул томонидан илгари сурилаётган ҳеч қандай сиёсат ёки таклифга қизиқмаймиз ва Жанубий Корея билан ҳеч қандай музокаралар олиб бориш эҳтимоли йўқ”, дея таъкидлаган Ким Ё Чжон.

Шунингдек, у Жанубий Кореяда икки томонлама алоқалар учун масъул бўлган Бирлашув вазирлиги (Unification Ministry)ни қайта тиклаш ташаббусини тилга олган ва ушбу вазирликни тугатиш кераклигини айтган. Чунки унинг таъбирида, икки Корея — мустақил давлатлардир.