Фото: Халқ сўзи

Наманган вилоятининг Тўрақўрғон туманига жойлашган икки ярим минг йиллик тарихга эга Ахсикент харобалари мозийдан сўзлаётгандек гўё.

Ўз даврида дунё тамаддунида муносиб ўринга эга бўлган қадимий шаҳар ўрнидаги тарихий ёдгорлик бутун жаҳон, хусусан, илмий жамоатчилик эътиборини тортиб келмоқда. Кейинги йилларда бу ерда изланишлар кўлами тобора кенгайди. Кеча мажмуага ташриф буюрган Халқаро математика конгресси аъзоси, хитойлик академик Ёнгбин Руан ҳам кўҳна шаҳарда олиб борилаётган тадқиқотларда қатнашишга қарор қилганини билдирди.

— Ўттиз йилдан буён математика илми билан бирга археология билан ҳам шуғулланаман, —дейди жаноб Руан. — Ахсикентга бежиз келмадим. Илмий ва техник имкониятларимдан келиб чиқиб, сунъий интеллект ёрдамида археологик изланишларга кўмак бермоқчиман. Бу орқали тарихни чуқур ўрганиш имконияти пайдо бўлади. Бирор топилма ҳақида сунъий идрок орқали барча маълумотни аниқ билиш мумкин. Амалий ишларга киришадиган вақтимиз эса узоқ эмас — келгуси йил бу ерга олимлар, археологлар жамоаси билан ташриф буюрамиз.

Хитойлик меҳмон билан Ахсикент ёдгорлиги ҳудудидаги барча археологик объектлар, уларда амалга ошириладиган ишлар бўйича ўзаро кенгаш ўтказилди.

Айни пайтда Ахсикент археология мероси объектини муҳофаза қилиш ва тадқиқ этиш дирекцияси “TourismLab” маркази билан биргаликда Олий таълим, фан ва инновациялар вазирлиги бошчилигида фундаментал лойиҳалар ишлаб чиқмоқда.

                                                            Қудратилла НАЖМИДДИНОВ, “Халқ сўзи”.