Ҳукуматнинг 2026 йил 11 февралдаги 51-сон қарорига асосан халқаро таълим дастурлари жорий этилган техникум ходимлари меҳнатига ҳақ тўлашнинг янги тартиби тасдиқланди. Бу ҳақида Таълим назорати Telegram-канали маълумот берди.

Мазкур қарорга кўра:

• 100 фоизлик устама: халқаро дастурларга жалб қилинган директор, бош бухгалтер, ўқитувчи ва усталарга ҳар ойлик мажбурий устама берилади;
• Рағбатлантириш жамғармаси: Меҳнатга ҳақ тўлаш фондининг 50 фоизи миқдорида махсус жамғарма ташкил этилади;
• Натижага қараб мукофот: юқори рейтинг балли тўплаган педагоглар базавий ставкасига нисбатан 200 фоизгача қўшимча рағбатлантирилади.

Рағбатлантириш мезонлари:

• Ўқувчиларнинг ўзлаштириш даражаси ва халқаро танловлардаги ғолиблиги;
• Чет тилини билиш (камида B2 сертификати);
• Халқаро илмий базалардаги (Scopus, Web of Science) мақолалар;
• Дунёнинг ТОП-1000 талигига кирувчи ОТМ дипломига эгалик.

Шунингдек, халқаро дастурлар бўйича бўлим бошлиғи ва мутахассисларнинг иш ҳақи миқдорлари мактаб директори ўринбосари ҳамда тоифали ўқитувчиларнинг базавий ставкаларига тенглаштирилган.