Фото: AP

Камерун пойтахти Яунде шаҳридаги стадион олдидаги тиқилинчда камида олти киши ҳалок бўлган. Бу ҳақда шаҳар губернатори Насери Пол Бийига таяниб Associated Press хабар бермоқда. Губернаторга кўра, ҳалок бўлганлар сони бундан ҳам кўпроқ бўлиши мумкин. Чунки шаҳардаги касалхоналардан бирининг вакили муассасага 40 нафар жабрланувчи олиб келингани, улардан айримларининг аҳволи оғирлиги боис бошқа шифохоналарга йўналтирилгани ҳақида маълум қилган. 

Маълум қилинишича, стадионда Камерун ва Комор ороллари ўртасида футбол бўйича Африка Миллатлар кубоги ўйини бўлиб ўтган. Стадиони 60 000 кишига мўлжалланган бўлсада, пандемия туфайли унинг бандлиги 80 фоиз этиб белгиланган. Аммо ўйингоҳга 50 мингга яқин одам киришга уринган.

Камерун 50 йил ичида биринчи марта Африка кубоги ўйинига мезбонлик қилди. Унинг бошланишидан бир кун олдин Яунде шаҳрида яна бир фожиа юз берди: тунги клублардан биридаги кетма-кет портлашлар ва ёнғин натижасида 17 киши ҳалок бўлган. Шундан сўнг Камерун президенти ўйин вақтида хавфсизликни таъминлашга чақирган эди. 

Баҳсда Камерун терма жамоаси 2:1 ҳисобида ғалаба қозонди ва кубокнинг чорак финалига йўл олди.