Видеодан кадр

Тошкент шаҳри Яккасарой туманида «Gentra» билан йўл талашган BYD ҳайдовчиси йўловчи аёлнинг ҳомиласи нобуд бўлишига сабабчи бўлди. Пойтахт Ички ишлар бош бошқармаси ахборот хизмати мазкур ҳолат юзасидан маълумот берди.

Билдирилишича, воқеа Яккасарой тумани Муқумий кўчасида рўй берган. BYD ҳайдовчиси йўлнинг қатнов қисмида машиналарнинг эркин ҳаракатланишига қаршилик қилган ҳолда, йўл ҳаракати қоидаларини қўпол равишда бузиб, сунъий тирбандлик ҳосил қилган ҳамда ўзидан олдинда ҳаракатланиб кетаётган «Gentra» русумли транспорт воситаси йўлини тўсиб тўхтатган.

Шундан сўнг у машина ойнасини тепиб синдирган ва ҳайдовчисини калтаклай бошлаган. Бу ҳам етмагандек, BYD ҳайдовчисининг отаси ўғлининг безорилик ҳаракатларини олдини олиш ўрнига «самосуд»га шерик бўлган. Ота-бола жабрланувчи ва ўша куни у билан бирга машинада бўлган турмуш ўртоғини турли қўпол сўзлар билан ҳақоратлаб, жисмоний куч ишлатган.

Ачинарлиси воқеа шу билан тугамаган, «Gentra» ҳайдовчиси муштумзўр ота-ўғилга хотинининг ҳомиладор эканини айтиб, муросага келишни сўрашига қарамай улар қўпол хатти-ҳаракатларини давом эттирган. Энг даҳшатлиси эса ушбу воқеадан сўнг жабрланувчи аёлнинг ҳомиласи нобуд бўлган.

«Йўлнинг ўнг томонида ҳаракатланиб кетаётган эдим, шундан сўнг қайрилиш ишорасини ёқиб, чап томонга ўтдим. Ҳеч кимга халақит қилганим йўқ, бемалол кетаётган дим. Кейин орқамдан BYD келиб бир неча бор сигнал чалди. Бу вақтда хотинимнинг мазаси қочгани сабаб секинроқ ҳайдашимни сўради. Кейин йўлимни тўсиб, ойнани синдирди ва уришни бошлади. Хотиним ҳомиладор дейишимга қарамай калтаклашни давом этди. Гапиришга имкон бермади. Юзим ва қўлларим ойна синиқларидан шилинган, аёлимнинг ҳам қўллари шишган ва қошида ҳам қайсидир зарба таъсирида оғриқ бўлган», дея вазиятни изоҳлайди «Gentra» ҳайдовчиси.

BYD ҳайдовчиси эса воқеани «озгина келишмовчилик» деб атаб, туғилажак фарзандидан эрта айрилган оила ва бутун Ўзбекистон халқидан узур сўради. У шунингдек, машинада аёл киши борлигини билмаганини айтган. Бироқ ижтимоий тармоқларда тарқалган видеода жабрланувчи ташвишли оҳангда бир неча бор: «аёлим ҳомиладор, аёлим ҳомиладор», деб айтгани аниқ ва тиниқ эшитилган.

Жаҳлини жиловлай олмаётган ўғилини тарбияга чақириш, уни тўғри йўлга бошлашга масъул бўлган ота бу вазиятда керакли ишни бажариш ўрнига жиноятга шерик бўлади деб ким ҳам ўйлабди. Буни устига у ИИБ терговчилари билан суҳбатда ҳаммасига гўёки «Gentra» ҳайдовчисининг ўзи айбдор бўлганини айтган.

«Ўғлим сигнал чалганида «Gentra» ҳайдовчиси ойнадан қўлини чиқариб, озгина ҳақорат қилди, нималардир деди билмай қолдим. Асосий айб менда бўлди. Пушаймонман», деган у.

Биргина узур сўраш ва муроса йўли билан ҳал бўладиган ҳолат бу сафар каттароқ талафотларга сабаб бўлди. Шу куни жабрланувчи аёлнинг ҳомиласи нобуд бўлган.

Мазкур ҳолат юзасидан Яккасарой тумани ИИО ФМБ ҳузуридаги Тергов бўлими томонидан ушбу шахсларга нисбатан Жиноят кодексининг 277-моддаси 2-қисми «б» банди (бир гуруҳ шахслар томонидан безорилик) билан жиноят иши қўзғатилиб, гумонланувчилар Жиноят-процессуал кодексининг 227-моддаси тартибида ушланган. Олиб борилган суриштирув ҳаракатлари давомида жабрланувчининг ҳомиласи тушгани аниқлангани сабабли ҳомиланинг тушиш сабабларини аниқлаш мақсадида судга оид тиббий экспертиза тайинланган.

Билдирилишича, экспертиза хулосаси натижасига кўра гумонланувчиларнинг ҳаракатларига қўшимча ҳуқуқий баҳо берилади. Ҳозирда тергов ҳаракатлари давом эттирилмоқда.