Таниқли «The Ring» журнали бир нечта номинация бўйича 2024 йилнинг энг яхши жангларини аниқламоқда. Номзодлар орасида ўзбекистонлик профессионал боксчилар иштирокидаги жанглар ҳам ўрин олган. Бу ҳақида Ўзбекистон профессионал бокс федерацияси хабар берди.

Унга кўра, супер яримўрта вазн тоифасидаги чарм қўлқоп устамиз Исроил Мадримовнинг америкалик машҳур Теренс Кроуфордга қарши чемпионлик ҳимоя жанги йилнинг энг яхши оқшоми номинациясига киритилган. Жангда Кроуфорд ҳакамларнинг баҳсли қарори билан очколар ҳисобига кўра Мадримовдан устун келган эди.

Бундан ташқари, боксчимиз Отабек Холматов иштирокидаги жанг иккита номинация бўйича йилнинг энг яхшиси деб топилиши мумкин.

Ярименгил вазн тоифасидаги Отабек Холматовнинг WBA камари йўлида америкалик Раймонд Фордга қарши ўтказган баҳси йилнинг энг яхши раунди ва йилнинг энг яхши жанги номинациясида номзод сифатида кўрсатилган.

Ушбу жангда Отабек Холматов тўлиқ 11 раунд рақибидан устун келган. Афсуски, Раймонд Форд ҳамюртимизни 12-раунднинг сўнгги сонияларида техник нокаут эвазига мағлуб этган эди.