Ўзбекистон Республикаси Олий Мажлиси Қонунчилик палатасининг навбатдаги мажлисида иқтисодий жиноятларга қарши курашиш тизимини такомиллаштиришга қаратилган қонун лойиҳаси иккинчи ўқишда муҳокама қилинди.

Мазкур қонун лойиҳаси давлат молиявий назоратини такомиллаштириш ҳамда иқтисодий жиноятларни тергов қилиш бўйича ваколатларни аниқ белгилаш мақсадида бир қатор қонун ҳужжатларига ўзгартиш ва қўшимчалар киритишни назарда тутади. Шунингдек, лойиҳа билан Жиноят-процессуал, Маъмурий жавобгарлик тўғрисидаги ҳамда Бюджет кодексларига тегишли қоидалар киритилмоқда.

Қонун лойиҳасида Бош прокуратура ҳузуридаги Иқтисодий жиноятларга қарши курашиш департаментининг ваколатлари аниқ белгилаб берилган. Уларга давлат молиявий назоратини амалга ошириш, иқтисодий жиноятларни тергов қилиш ва тегишли чораларни кўриш вазифалари юкланмоқда. Мазкур ўзгартишлар давлат органлари ўртасидаги ваколатларни қонуний асосда белгилашга ва уларни аниқ бажарилишини таъминлашга хизмат қилади.

Қонун лойиҳасининг қабул қилиниши суд-ҳуқуқ ислоҳотлари учун муҳим ҳуқуқий замин яратади. Лойиҳа асосида жиноятларни тергов қилишда қонунчилик базасини мустаҳкамлаш ва давлат органлари фаолиятида аниқлик яратиш кўзда тутилган. Шунингдек, бу ўзгаришлар бюджет қонунчилигининг бир хил қўлланилишини таъминлашга ҳам йўналтирилади.

Мажлис давомида депутатлар лойиҳанинг ҳуқуқий асосларини атрофлича муҳокама қилиб, унинг ижтимоий ва иқтисодий аҳамиятини таъкидладилар. Қонун лойиҳаси бюджет молияси ва иқтисодий жиноятларга қарши кураш борасидаги давлат ислоҳотларининг ҳуқуқий жиҳатдан мустаҳкамланиши учун муҳим қадам сифатида эътироф этилди.