Овулда яшайдиганларни «қишлоқи», деб калака қиладиганлар бекор айтибди. Уларни интернетни билмаслик, компьютерда ёзолмасликда айблайдиганлар ҳам ғирт чаласавод. Қишлоқдагилар мобода телефонда бақириб гапирса, бу "овулбайский"лик эмас, асло. Бу мажбурият. Чунки, "связь" балоси бошга тушгандан кейин одам ҳар нарсани қилишга қодир бўлади. Ёки ёлғонми?!

Ёзги таътилга чиқиб, туманга боргандим. Овулга киришдан “Beeline” сим картаси "Толко экстренный вызов"га ўтди, “Ucell”им зинага ўхшаб, "антеннаси" рақсга тушди. Энди интернетни-ку айтмай, мен ўлай. "Е" белгиси "чиқайми, чиқмайми", дея танноз хонимлардай ўйланиб узоқ туради. Бировга “Telegram”дан ёзган хабарим "алоқа" излаб, телефонимни тепага кўтаравергач аранг 2 соатда кетди. Ўшанда қўшни йигит уйи томига чиқиб, "антенна" тутиш учун зинага кўтарилишимни маслаҳат бериб, жонимга ора кирганди.

Икки кун интернет билан мушук, сичқон ўйнаб, асабларимни еб тугатганим рост. Менга на телефон қилиб, на интернетдан боғлана олмаётганлар "нима цивилизациядан узилиб қолдингми?", дея тўнғиллайди. Уларга дардимни айтсам мен ёлғончи, улар ҳақ; “Қўйсанг-чи, алоқа йўқ дейсанми, ўзи қайси даврда яшайсан”, дейди менга. Шу ўринда бечора содда халқни алдаб, пули ва мегабайтини аямай шилаётган алоқа компанияларига эътирозим жўшиб кетади. Нега шаҳардаги алоқа айрим қишлоқларда йўқ, бу овулнинг қаери кам пойтахтдан, дейман ўзимга-ўзим. Ахир Қорақалпоғистоннинг деярли кўпчилик халқи шу қишлоқда яшайдигани ҳақиқат, бу ҳақиқат қаерда қолди, дейман яна ўзимга. Содда, одми, борига кўниб юраверадиган овул халқининг бор айби табиатиданми ёки хулқими!? Алоқа компанияларининг телеканалларда бераётган "тезкор интернет ва гегабайтлар" рекламаси бу ерликлар учун бугун чўпчак.

Оғамга қўнғироқ қилсам, нуқул овозини баланд гапиради. Жаҳлим чиқарди, телефондан ҳам тузук гаплашиб билмайди бу киши, деб. Энди ўша жаҳлимга ўзимнинг жаҳлим чиқяпти. Алоқа яхши бўлмагач, у қоқиндиқ эшитсин деб қаттиқ гапиргандаги куни экан ўшанда!

Бундан бир йил аввал интернет тезлигининг кучайгани ҳақида роса шув-шув кўтардик. "Урра, урра", деб қарсак чалдик ҳам. Фаҳмлашимча, ўшанда ҳаммадан ҳам кўпроқ қувонган шу қишлоқдагилар бўлди. 9-синф ўқувчиси ўртоқларига бу гапни эшитиб, "ювиб" берганини ҳам эшитиб роса кулгандим. Энди билсам, бу куладиган гап эмас экан. Мен янглишмабман, чунки у бола интернет орқали овулига келаётган билим, илм ва янгиликлардан хурсанд бўлган экан шунда.

Яна жиддий савол: Узоқ туман ва овулларга борган алоқа компанияларининг интернет симларига нима бўлган ўзи?! Шу саволга кимдир аниқ жавоб топса, албатта бу ёқларда ҳеч ким томга чиқиб, "связь" ушламайди, интернет билан мушук, сичқон ўйнамайдиган бўлади.

Бу охирги гапим эмас, сўнгги гап айрим қишлоқларда алоқа яхшиланганда айтилади. Унгача сукут сақлаб, кутилади. Уч нуқта...

Қумар Бегниязова
("Халқ сўзи")