Фото: EPA

Австралиялик олимларнинг айтишларича, улар инсон иммун тизими коронавирус билан қандай курашишини аниқлашга муваффақ бўлишган.

Уларнинг сешанба куни NatureMedicine журналида чоп қилинган изланишлари натижаларига кўра, янги вирусли инфекцияни енгишнинг механизми оддий тумов билан курашникидан деярли фарқ қилмайди.

Бу хулоса коронавирус вакцинасини ишлаб чиқишга ёрдам бериши мумкин.

Бугунга келиб дунё бўйлаб коронавирусни 190 мингдан ошиқ юқтирган, 7 ярим минг одам эса ундан вафот этган.

“Бу ихтиронинг аҳамияти шундаки, биз биринчи марта иммун тизимимиз янги коронавирус билан қандай курашиши борасида тўлиқ маълумотга эга бўлдик“, — дейди тадқиқот муаллифларидан бири, профессор Катрин Кедзирска.

Кўплаб мутахассислар Мелбурн шаҳридаги Питер Доерти номли инфекциялар ва иммунитет институтида ўтказилган бу тадқиқотга жуда яхши баҳо бердилар.

Олимлар нимани аниқлашди?

Cоvid-19ни юқтирган одамларнинг аксарияти соғайиб кетгани инсон иммун тизими бу вирусга яхши дош бера олишига яққол мисол бўлган.

Лекин, бу кураш айнан қандай юз беради? Австралиялик олимлар бу курашда иштирок этадиган иммун ҳужайраларининг тўртта турини аниқлашди.

Тадқиқотда ўтмишда соғлиғидан шикоят қилмаган ва коронавирусни осон кечирган кўнгиллилар иштирок этишди.

Масалан, Австралиядаги касалхоналардан бирига тушган уҳанлик 47 ёшли аёл 14 кун ичида соғайиб кетган.

Би-би-си билан интервюда профессор Кедзирска бу беморнинг иммун тизимидаги реакцияларни тўлиқ тарзда ўрганиб чиқишганини айтди.

Тузалишни бошлашидан уч кун аввал аёлнинг қонида муайян ҳужайралар кўзга ташлана бошлаган.

Кедзирсканинг айтишича, таҳминан шунга ўхшаш босқичда оддий грип билан оғриган беморлар қонида ҳам худди шу ҳужайралар пайдо бўлади.

“Бизни бу натижалар жуда қувонтирди. Биз инфекцияни юқтирган беморларнинг клиник соғайиш жараёнида иммун ҳужайралари пайдо бўлишини қайд қилишга муваффақ бўлдик“, — деди профессор Кедзирска. 

Унинг билдиришича, бу натижаларга эришиш учун ўндан ортиқ олимлар тўрт ҳафта давомида куну тун қон анализларини олиб турганлар.

Бу коронавирусга қарши курашга қандай ёрдам бериши мумкин?

“Иммун ҳужайралари қачон ишга тушишини билиб олганингиздан кейин бемор соғайишнинг қайси босқичида эканини аниқлашингиз имкони бўлади“, — дея тушунтиради Суинберн технологик университети декани, профессор Брюс Томпсон.

Ўз навбатида, Австралия Соғлиқни сақлаш вазири таъкидлашича, олимларнинг бу кашфиёти вакцина ва бу инфекцияни даволаш учун эҳтимолий дориларни ишлаб чиқаришни тезлаштириши мумкин.

Катрин Кедзирска эса энди янги вазифани олимлар гуруҳи олдига қўйган: нега энг оғир ҳолларда иммун тизими касаллик манбаига кучсиз реакция қилишини аниқлаш.

“Бу, ўз навбатида, мазкур вирусдан ўлганлар ёки ундан оғир касалланганлар бошқа беморлардан нимаси билан фарқ қилишларини аниқлашга имкон беради, ва шу йўл ёрдамида биз уларнинг ҳаётини сақлаб қолиш усулларини тушунишимиз мумкин бўлади“, — дейди профессор Кедзирска.