Фото: AP Photo / Matt Rourke

Америкалик миллиардер Илон Маск сиёсий партия тузиш ғоясини вақтинча четга сурмоқда. Бу ҳақда Wall Street Journal хабар берди.

Маълумотларга кўра, Маск ўз сафдошларига компаниялари фаолиятига кўпроқ эътибор қаратмоқчи эканини айтган. Шунингдек, у янги партия тузиш орқали Республика партияси сайловчиларини ўз томонига оғдириб қўйишни ҳам, нуфузли республикачилар билан муносабатларни бузиб олишни ҳам хоҳламаётгани қайд этилган.

WSJ ёзишига кўра, сўнгги ҳафталарда Маск АҚШ вице-президенти Жей Ди Вэнс билан мулоқот қилиб турган. У кўпчилик томонидан Make America Great Again ҳаракатининг вориси сифатида кўрилмоқда. Маск эса яқин ҳамкорларига агар партия тузишга қарор қилса, бу унинг Вэнс билан муносабатларига салбий таъсир қилишини тан олган.

Шу боис Маск шериклари июль ойи охирига белгиланган учинчи партиялар фаолиятига ихтисослашган гуруҳ билан учрашувни бекор қилишган. Уларнинг айтишича, Маск ҳозирча фақат бизнесини бошқаришга йўналмоқчи.

Эслатиб ўтамиз, июль ойи бошларида Илон Маск «Америка» деб номланган сиёсий партия тузиш нияти борлигини билдирган ва унинг рўйхатдан ўтказилиши учун ҳужжатларни ҳам топширган эди.