Фото: Иллюстратив фото

Сўнгги ойларда жамоатчилик муҳокамасида бўлиб турган «Sea Breeze Uzbekistan» лойиҳаси юзасидан Ҳукумат ўз қарорини чиқариш арафасида турибди. Фуқаролар ва фаоллар томонидан билдирилган эътирозлар инобатга олинган ҳолда, лойиҳа инвестори олдига жиддий шарт ва мажбуриятлар қўйилди. Бу ҳақда экология, атроф-муҳитни муҳофаза қилиш ва иқлим ўзгариши вазирининг маслаҳатчиси Расул Кушербаев маълум қилди.

Жумладан, лойиҳа қурилаётган ҳудуд — Тошкент шаҳрини ичимлик суви билан таъминлаб турувчи Чорвоқ сув омборига яқин жойлашгани сабаб, мазкур манбаларга қурилиш ишлари ёки фаолият жараёнида сув тушиши эҳтимоли катта хавотир уйғотган эди. Ҳукумат талабларига кўра, Чорвоқ сув омбори ва Чирчиқ дарёсига лойиҳа доирасида сув тушишига йўл қўйилмайди.

Инвестор, ўз навбатида, лойиҳа фаолиятида сувни қайта ишлаш ва уни айланма усулда қайта ишлатишга мўлжалланган замонавий ва экологик хавфсиз тизимни яратиши шарт. Барча харажатлар инвестор ҳисобидан амалга оширилади.

Ҳукумат қарорида таъкидланишича, агар лойиҳа натижасида Чорвоқ сув омборига ҳатто бир томчи сув туширилса ҳам, қурилиш тўхтатилиб, инвестиция шартномаси бекор қилинади ва ер майдони давлатга қайтариб олинади.

Бош прокуратура лойиҳа амалга оширилаётган ҳудудда барча шаҳарсозлик ва экологик меъёрларга қатъий риоя этилишини назорат остига олади. Вазирлар Маҳкамаси ва Бош прокуратура дастлабки лойиҳа ечимларидан тортиб, объектларни фойдаланишга топширишгача бўлган барча босқичларда қонунийлик ва шаффофликни таъминлаш учун масъул ҳисобланади.