Фото: Reuters

АҚШ президенти Дональд Трамп Буюк Британияга ташрифидан сўнг ушбу мамлакатнинг бош вазири Кир Стармер билан қўшма матбуот анжумани ўтказди. Унда Оқ уй раҳбари россиялик ҳамкасби Владимир Путин билан муносабатлари, Украинадаги можаронинг ҳал этилиши, Россияга қарши янги санкциялар қўлланилиши ҳақида гапирди.

Оқ уй раҳбари Украина инқирози ҳақида гапирар экан, можаро учинчи жаҳон урушига айланиши мумкинлигини айтди. Трампнинг сўзларига кўра, энди бу таҳдид ўтиб кетди.

«Ўйлайманки, менимча биз ҳозир бундай вазиятда эмасмиз. Бироқ, ҳамма нарса Учинчи жаҳон уруши томон кетаётган эди», — деди АҚШ президенти. Сиёсатчининг қўшимча қилишича, агар у президент бўлганида бу можаро содир бўлмасди.

АҚШ етакчиси Россия президенти билан яхши муносабатда бўлгани учун Украина инқирозини ҳал этиш оддий вазифа деб ўйлаганини тан олди. Бироқ, бу мақсадга эришиш у кутганидан ҳам қийинроқ бўлиб чиқди. Хуллас, Трампнинг айтишича, Путин унга панд берган.

«Путин менга панд берди. Ҳақиқатдан панд берди», — деди Ой уй раҳбари.

Шу билан бирга, у россиялик ҳамкасби билан 15 август куни Аляскада ўтказилган учрашувни хато деб ҳисобламаслигини таъкидлади.

Бироқ, Трампнинг сўзларига кўра, қийинчиликларга қарамай, Украина можаросини ҳал қилиш бўйича ишлар давом этмоқда. «Россия билан боғлиқ вазиятга келсак, умид қиламанки, тез орада сиз учун яхши хабар бўлади», — деди у журналистларга.

Америка етакчисининг қўшимча қилишича, ўзини Украинада келишувга эришишга «мажбур ҳисоблайди» ва бу ҳали амалга ошмаганидан хафа.

Трамп АҚШ президенти этиб қайта сайланишидан олдин ҳам Украина можаросига имкон қадар тезроқ барҳам бериш ниятини билдирганди. Жумладан, 2023 йилнинг февралида тарафдорлари билан учрашувда у сайловда ғалаба қозонса, дарҳол Россия ва Украина президентларига қўнғироқ қилиб, можарога барҳам беришга ваъда берганди. Сайловда ғалаба қозонган сиёсатчи 2025 йилнинг апрель ойида бу баёнотни ҳазил эди деди. Бироқ у Украинадаги жангларни тугатишига ишонтирди. Шу йилнинг январь ойида у буни олти ой ичида амалга ошириши мумкинлигини тахмин қилган.

АҚШ етакчисига кўра, Украинадаги можаро нефть нархи тушиб кетганидан кейин тугаши мумкин. Трампнинг фикрича, бу сценарийда Россия раҳбариятининг «урушни тарк этишдан бошқа иложи қолмайди».

Шу билан бирга, у баъзи Европа давлатлари Москвадан нефть сотиб олаётган экан, Россияга қарши янги санкциялар қўйишга тайёр эмаслигини айтди. Бу, сиёсатчининг фикрича, АҚШга қарши адолатсиз ўйин.

«Мен бошқа ишларни қилишга тайёрман, лекин мен учун курашаётган одамлар Россиядан нефть сотиб олаётганда эмас», — деди Трамп.