Супероғир вазнда собиқ жаҳон чемпиони Тайсон Фьюри кутилмаганда профессионал боксдаги фаолиятини якунлаганини эълон қилди. Бу ҳақида «The Athletic» нашри хабар берди.

«Мен боксдан кетганимни эълон қилмоқчиман. Бу йўл жуда ажойиб бўлди, мен унинг ҳар бир дақиқасини яхши кўраман ва шу билан якунлайман», — дейди Фьюри.

Қизиғи шундаки, британиялик боксчи учинчи бор фаолиятини якунлаётганини эълон қилган. Бунгача Фьюри 2016 йилда Владимир Кличкони мағлубиятга учратганидан кейин боксдан кетишини айтган эди. 2018 йилга келиб, икки йиллик танаффусдан сўнг Фьюри яна профбоксга қайтганини маълум қилган.

2022 йилда у ҳамюрти Диллиан Уайтни мағлуб этганидан кейин иккинчи бор фаолиятини тўхтатишини эълон қилган. Бунга сабаб қилиб Деонтей Уайлдерга қарши ўтказилган учта жангдан кейин супероғир вазнда ўзига муносиб рақиб қолмаганини айтган. Орадан олти ой ўтиб, яна ўз фаолиятини тиклаган ҳамда профессионал боксдаги юришини давом эттирган.

Тайсон Фьюри сўнгги икки жангини украиналик WБА, WБC ва WБО чемпиони Александр Усикка қарши ўтказиб, ҳар иккала жангда ҳам очколар ҳисобида мағлуб бўлди.

Британиялик боксчи шу вақтга қадар икки марта оғир вазн тоифасида чемпион бўлган. Фаолияти давомида 34 ғалаба, икки мағлубият ва битта дуранг натижаларни қайд этган.