Битирувчиларнинг 20 нафари давлат гранти ва 16 нафари тўлов- контракт асосида нуфузли олий таълим даргоҳларига ўқишга қабул қилинди. Хусусан, улар Мирзо Улуғбек номидаги Ўзбекистон Миллий университети, Ўзбекистон давлат жаҳон тиллари университети, Алишер Навоий номидаги Тошкент давлат ўзбек тили ва адабиёти университети, Жаҳон иқтисодиёти ва дипломатия университети, Ўзбекистон Журналистика ва оммавий коммуникациялар университети ҳамда Гулистон давлат университети каби олий таълим муассасалари талабаси бўлдилар.

—Омад билимлиларга кулиб боқади, дейишгани рост экан,—дейди Ўзбекистон Миллий университетининг журналистика факультетига ўқишга қабул қилинган Матлуба Шакарова. — Тест жуда шаффоф ва ҳаққоний тарзда ўтди. Билим ва маҳорат ўз сўзини айтди. Мен оташин шоира Ҳалима Худойбердиева номидаги мактабда таҳсил олиб, нуфузли университет талабаси бўлганимдан фахрланаман.

Эслатиб ўтамиз, мазкур ижод мактабининг 3 нафар ўқувчиси муддатидан олдин Малайзия, АҚШ, Латвия давлатларининг халқаро университетларига грант асосида ўқишга қабул қилинган эди.

Аҳмадали ШЕРНАЗАРОВ,

“Халқ сўзи”.